سەندیکای رۆژنامەنووسان لە کوێیە؟ پەرلەمان کاری چیە؟
ئاسۆس هەردی

یەکێک لەو "دەسکەوتانە!"ی سەندیکای رۆژنامەنووسانی کوردستان و پەرلەمانی کوردساتانیش شانازی پێوە دەکەن، یاسای رێکخستنی کاری رۆژنامەوانیی ژمارە ٣٥ی ساڵی ٢٠٠٧ە. چونکە سەرباری هەموو تێبینییەکان لەسەر ئەو یاسایە (کە بێگومان کەم نین)، پێیان وایە "بەراورد بە یاساکانی کاری رۆژنامەوانی لە ناوچەکەو وڵاتانی دەوروبەرمان، کراوەترەو نزیکترە لە پێوەرەکانی زامن کردنی ئازادیی رادەربڕین".


کەچی ئەوەتا بەبەرچاوی سەندیکاو پەرلەمانەوە "دادوەرێک"، ئەو یاسایە دەخاتە زبڵدانەوەو بە ئارەزووی خۆی لە چوارچێوەی یاسایەکدا مامەڵە لەگەڵ بابەتێکی رۆژنامەوانیی روون و ئاشکرادا دەکات، کە هیچ پەیوەندییەکی بە کێشەکەوە نیە: "یاسای خراپ بەکارهێنانی هۆکارەکانی پەیوەندی کردن"! بە راستی بەشەرمەوە ئەم قسەیە دەکەم، بەڵام لەوە دەچێ دادوەری بەڕێز وابزانێ ئەو رۆژنامەنووسانە وێنە، ڤیدیۆ، یان نامەی نەشیاوی هاوڵاتییەکیان بڵاوکردبێتەوەو ئابڕوویان بردبێ، بۆیە دەبێ سزا بدرێن، تەنانەت پێش یەکلابوونەوەی کێشەکە دەبێ دەستگیر بکرێن!!!


ئەو رووداوەی لە چێشتخانەی "حوققەباز"ی هەولێر روویدا، رووداوێکی گرنگ و بابەتێکی رۆژنامەوانیی گرنگ بوو نەک هەر بۆ هاولاتییانی کوردستان، کە رووداوەکە لە پایتەختەکەیاندا روویداوە، بەڵکو بۆ خەڵکی ناوچەکەو جیهانیش. بۆیە هیچ شتێک لەوە ئاسایی و چاوەڕوانکراوتر نیە کە رۆژنامەنووسانی کورد کاری لەسەر بکەن و هەوڵ بدەن پشتی پەردەی رووداوەکەو زانیاریی ورد لەسەری بە هاوڵاتیانی خۆیان بگەیەنن.


ئایا ئەو رۆژنامەنووسانە لە چۆنیەتی و شێوازی رووماڵکردنی ئەو رووداوەدا بەهەڵەدا چوون؟ ئایا کەسانێکیان بە هەڵەو بێ بەڵگە تۆمەتبار کردووەو ناویان زڕاندوون؟ ئایا زانیاریی هەڵەیان بڵاکردۆتەوە؟ زیانیان بە ئاسایشی نەوتەوەیی گەیاندووە؟... هتد. بۆ وەڵامی ئەم پرسیارانەو چۆنیەتیی بڕیاردان لەسەر ئەم کێشەکەیە، ئێمە یاسایەکمان هەیە کە پەرلەمانی کوردستان بە پێشنیازی سەندیکای رۆژنامەنووسان ، لەسەر دەستی فراکسێۆنی هەردوو حیزبی دەسەڵاتدارو بە ئیمزای سەرۆکی هەرێمی ئەوکات بڕیاری لەسەر داوە. ئەویش یاسای ژمارە ٣٥ی ساڵی ٢٠٠٧ە. یاسایەک کە بە ڕوونی زیندانی کردنی رۆژنامەنوو س قەدەغە دەکا، بۆ هەموو پێشێلکارییەکی لەوجۆرەش سزای دیاریکراوی داناوە.


باشە چۆن دادوەرێک کە "ئەرکی سەرشانی" ئەوەیە جێبەجێکاری یاسا بێت‌ و لە پێشێلکارییەکان بپێچێتەوە، ئەمە نازانێت یا فەراموشی دەکات؟! ئایا ئەمە بە روونی ئەو گومانانە تۆخ ناکاتەوە کە لەسەر سەربەخۆیی سیستمی دادوەریی لەکوردستاندا هەیە؟ ئەی باشە سەندیکای رۆژنامەنووسان و پەرلەمانی کوردستان، کە بە حسابی خۆیان دەسکەوتێکی گەورەیان بۆ رۆژنامەنووسان و ئازادیی بیروڕادەربڕین بەدەست هێناوە، لە کوێن و بۆ زمانیان بەرامبەر ئەم گاڵتەجاڕییە بەستراوە؟


من زۆر لەمێژە دەزانم لە کوردستاندا کاتێک کە کەسێک یان رێکخراو و دامودەزگایەکی دەسەڵاتدار ببنە لایەنی کێشەیەک (جا لە هەر بوارێکی ژیان و کۆمەڵگەدا بێت)، نە یاسا کار دەکات و نە رێکخراو و دامودەزگاکانیش هیچ دەسەڵاتێکیان هەیە، بەڵام بە پێویستیشی دەزانم لە هەموو رووداوێکی لەمجۆرەدا، راستییە زەق و تاڵەکە بەبیری هەموو ئەو کەسانە بێنینەوە کە زۆرجار قسەی زلمان پێدەفرۆشن و تۆمەتبارمان دەکەن بەوەی رەش بینین و دانی خێر بە هیچ کارێکی باش و جدییدا نانێین.


بە هاوڕێ و هاوپیشەکانیشم دەڵێم: سەرتان بەرزو ورەتان پۆڵایین... ئێوە رێبواری رێگەی سەختی دەرخستنی راستییەکانن. دەشیت وەکو هەموو مرۆڤێک بەهەڵەدا بچن و ئازایانە بەرپرسیارێتی هەڵەکانتان هەڵگرن، بەڵام مادام بەئاگاهێنانەوەی هاوڵاتییانی وڵاتەکەتان کردۆتە ئەرک و پیشەی سەرەکیتان، دڵنیابن سەربەرزی و ئایندە هەر بۆ ئێوەیەو خەڵک و هەموو ئازادیخوازانیش پشتیوانتانن.




زه‌مه‌ن
AM:05:21:31/10/2019