15 ساڵ لەمەوبەر هاوڵاتی مێژویەکی نوێی بۆ خۆیی‌و رۆژنامەگەری کوردی تۆمارکرد، 5/11/2000 ئەو رۆژەی یەکەم رستەی چوار وشەیی لەنوسینەوەی خۆی بۆ مێژوی رۆژنامەگەریی کوردیدا بەپرشنگداری تۆمارکرد (رۆژنامەیەکی سیاسی گشتی ئەهلیی)ە.
مێژویەک کە شانازی گەورەی ستافەکەیەتی، ئەوانەی رۆژێک کاریان تێدا کردبێت‌و ئەوانەشی چاودێری دەکەن، لەگەڵ ئەوانەی خوێندویانەتەوەو دەیخوێننەوە (دژو تەبا) شایەدی دەدەن، ئەگەر بێویژدانی نەکرێت.
ئەوکاتەی بیرمانلێکردەوە لەبەردەم تەحەدییەکی گەورەدابوین، ئێمە ئەو رسکەمان کرد.
ئەوکاتەی بیرۆکەکەمان کرد بەپراکتیکی‌و دەستمانپێکرد شتێکی ئەوتۆ نەبوو بەناوی ئازادی رادەربڕین‌و ئازادی نوسینەوە، گوێمان بەهەڕەشەکان نەدا، بۆیە: قوربانیماندا، ئازاردراین، زیندانی کراین، پێشیلی مافەکانمان کرا، هەندێک کات یاساغ بوین… لەهەموشی مەترسیدارتر دەیانویست بەیاساکانی تیرۆر بمانوەستێنن، بەڵام ئەوکات بەردەوامیمان کردە ئەولەویەت، ناومان نابوو کارکردن بەرۆحی شۆڕشگێڕانە. شۆڕشەکەمان شۆڕشی شار بوو. وەک چۆن ئەو بۆچونەمان نەگۆڕە (هاوڵاتی شۆڕشێک بوو لەبواری رۆژنامەگەریدا).
ئەو تەحەدیاتانە مشتێک بون لەخەروارێک، بەڵام لەڕوبەڕوبونەوەیان بەردەوامبوین، تاگەیشتە ئەوەی قوتی خۆمان بۆ وشە بڕی، چیمان دەویست: کۆمەڵگەیەکی مۆدێرن، پەروەردەیەکی تەندروست، سیاسەتێکی حەکیمانە (دەربازبون‌و تێپەڕاندنی دۆخی دوو ئیداریی‌و نەهێشتنی ئاسەواری شەڕی ناوخۆ)، ئەوانە بەس نەبون داوای چەسپاندنی مافی هاوڵاتی بون بۆ هەموو وەک یەک، دابینکردنی ئازادی رادەربڕین‌و برەودان بەدیموکراسی‌‌و دیالۆگمان دەکرد…
هەندێک کات دەستکەوتی مەزن، مێژویەک لەقوربانیت لەبیردەباتەوە، ئێمە هەست بەشانازی گەورە دەکەین، سەر بڵندین، ئەو مێژوە ئێمە تۆمارمانکرد، هاوڵاتی‌و مێژوییەکەی بۆ ئێمە سەرمایەیەکی گەورەیە، ئێوەش لەبیرمان بکەن مێژوو دادپەروەر دەبێت.
لە 16 ساڵی تەمەنیدا قۆناغەکانی گەشەسەندنی هاوڵاتی بەشانازییەکی تری خۆمان دەزانین، لەناوەڕاستی ساڵی 2007 هەفتانمان تێپەڕاند بۆ هەفتەی دوو ژمارە، دواتر لە 1/8/2012 هاوڵاتی تەحەدایەکی گەورەی کرد، گەشەسەندنێکی بێوێنەی لەمێژوی خۆیی‌و رۆژنامەگەری کوردیدا تۆمارکرد، کاتێک بەکوالێتییەکی سەردەمیانەو پڕۆفیشناڵانەتر بوو بەڕۆژانەو هەفتەی پێنج ژمارە (یەکشەممە تا پێنجشەممە) بڵاوکرایەوە. ماڵپەڕی هاوڵاتیش لەپاڵ رۆژنامەکەدا 24 کاتژمێر بەردەوامبوو.
لەپاڵ قۆناغەکانی گەشەسەندنیدا، هاوڵاتیش ئەرکەکانی وەک دەزگایەکی راگەیاندن هەندێک گۆڕانکاریی بەسەردا هات، ئەوەی دەیخوێنێتەوە هەستی پێدەکات، ئێستا ئەرکی سەرەکیمان گەیاندنی هەواڵ‌و زانیاریی‌و هۆشیارکردنەوەیە وەک یەکێک لەئەرکە سەرەکییەکانی رۆژنامەگەریی. ئەوەی زۆرجار دوبارەی دەکەینەوە ئێمە هەواڵ دەگوازینەوە وەک ئەوەی کە هەیە، نەک وەک ئەوەی دەمانەوێت.
پێنجشەممە لەژمارەی (1670)یدا هاوڵاتی پێ دەنێتە 16 ساڵی تەمەنییەوە، بەڵام هێشتا لەبەردەم زۆرێک لەو تەحەدیاتیانەی یەکەم ژمارەداین.
ئێستا سەرەڕای ئەوەی لەبەردەم قەیرانێکی قوڵی داراییداین، کە پریشکی قەیرانەکانی هەرێم بەر میدیای ئەهلیی‌و لەنێویاندا بەسەختتر رۆژنامەی هاوڵاتی کەوتوە بەهۆی کەمبونەوەی ریکلامی کۆمپانیاکان‌و نەبونی ئاگاداریی فەرمانگەکان تاڕادەیەکیش کەمبونەوەی تیراژ (فرۆشی رۆژنامەکە)، بەڵام دەمانەوێت بەردەوامبین. ئێمە بۆ بەردەوامبونمان هێشتا قوربانی راستگۆیی دەدەین.
هێشتا دەرگاکانی گەیشت بەزانیاریی بۆ رۆژنامەنوسەکانی هاوڵاتی واڵا نییە، مافی ستافەکەی لەگەیشتن بەزانیاریی پێشێلدەکرێت، لەسەر راستی وتن دادگایی دەکرێت، ئێستاش راپۆرتی رێکخراوە بیانیی‌و ناوخۆییەکان نانوسرێنەوە کە هاوڵاتی پشکی لەبەرکەوتنی پێشیلکارییەکان نەبێت‌و ئازارنەدرێت.
ئازارتر بۆ ئێمە لەدوای ئەو مێژوەوە پشتکردنی هەندێک لەکۆمپانیاکانە لەپێدانی رێکلامەکانیان بۆ هاوڵاتی، کە رەنگە ئەوەش کۆتایی هاوڵاتی بەدوادابێت، بەڵام هاوڵاتی دەیەوێت بەدڵسۆزی خوێنەرانی‌و خەمی کۆمپانیاکان بۆ پڕۆژەیەکی لەمجۆرە بەردەوامبێت‌و مێژوی پرشنگدارتر بنوسێتەوە.
دوای 15 ساڵ، هۆشیاریی‌و گەیاندنی زانیاریی ئەرکی سەرەکیمانە، لەپاڵ بێلایەنی‌و هاوسەنگی (وەک چۆن لەسەرەتادا بڕیارماندابوو).
ئێمە خۆمان بەچالاک دەزانین لەپێگەیاندنی رۆژنامەنوسی بەتواناو لێهاتوو، فشارو هەڕەشەو گوشارەکان رایاننەگرتین، هیوادارین لەئاست چاوەڕوانی خوێنەراندا بوبێتین‌و ببین. لەگەڵ ئەوەشدا دەمانەوێت بەردەوامبین بەهاوکاریی‌و کۆمەکی هەموو لایەک، بەڵام بێلایەنی خۆمان لەدەستنەدەین.