شۆڕشی سپی، بەو ئەنجامە بەردەست و تەواوكارییانە دەگوترێت كە لە ئەنجامی چاكسازیی ریشەیی لە بوارێك یا زێدەتر سەرهەڵدەدات و دەبێتە بنەمایەكی باش بۆ ئیدامەدان و بەرەوپێشبردنی بارودۆخەكە بەرەو باشتر.
لە ئێستادا پرسی بەردەوامی بوونی چاكسازی لە حوكمڕانی كوردستان بابەتێكی بایەخدارە چ لای هاوڵاتی چ لەو دروشمانەی حزبەكان بۆ پێكهێنانی كابینەی نۆیەم هەڵیانگرتووە.
گرنگترین پرسیار لەوەدایە ئاخۆ ئەم شۆڕشە سپیە لە كوردستان زەمینەی بۆ خۆشكراوە؟ كارەكتەر و پرۆژە و ستراتیژیەتی پێویست لەبەردەستن؟
بێگومان ئەگەر تەركیز بەتەنیا لەسەر ئەوە بێت دەموچاوی نوێ دەتوانێ ئەوە بكات، ئەوە پشتبەستنێكی هەڵەیە.
ناتوانم گومان لەوە دروستبكەم كەسی یەكەم خاوەن روئیایەكی روون نەبێت، بەڵكو باش لەوە تێدەگەین ئامانجێكی مەزنی هەیە لە بەرپاكردنی شۆڕشێكی سپی بۆ نیشاندانی تواناكانی خۆی لەو چەند ساڵەی كە دەبێتە پێوەری حوكمڕانییەكی باش.
گومانەكانی من و خەڵكی كوردستانیش ئەوەن، دەموچاوی نوێ لە نێو كابینە پێوەری سەركەوتنی شۆڕشەكەیە و دەتوانێ لە ئاست خواست و داواكارییەكانی خەڵك بێت، كە ئێستا خواستی نیشتمانی هەیە بۆ ئەوەی بەردەوامی لە چاكسازی بێتە بنكەیەكی فراوانی كاركردنی هاوبەشی هێزەكان.
ئاخۆ یاسا و رێنوێنییەكان لە هەرێمی كوردستان و بەتایبەت ئەو یاسایانەی هاوبەشن لەگەڵ عێراق رێگە دەدەن؟ ئاخۆ ئەوانەی دەبن بە وەزیر و خوارتر لەو پلە و پۆستانە خاوەن ئیرادەیەكی بەهێزن بۆ بەردەوامی و برەودان بە پرۆژەی چاكسازی؟ ئایا چاكسازی وەك هەمیشە دەبێتەوە خاڵی موزایەدەكردن و تێكەڵ دەكرێت بە ئامانجی سیاسی حزبەكان؟
ئەمانە پرسیارن، دەكرێت لەئێستاوە دەستبەرداری دروشم بین، هانگاوی كردەیی بۆ ئەو ئامانجە بنرێت، حكوومەت و كەسایەتییەكان نەكرێنە ئامانج بۆ پێهەڵگوتن، بەڵكو كەموكوڕییەكان دەستنیشان بكرێت و رەخنە بگیرێت و پەنجە لەسەر كەموكوڕییەكان دابنرێ. ئەگەریش سەركەوتن لە شۆڕشەكەدا نەبوو، ئەوكات دەبێت بگوترێت كە:پێوەرەكانی بەخشینی پلە و پۆست كەموكوڕی تێدا بوو.
خه‌بات