دوێنێ 2019/7/10 رێزدار مەسرور بارزانی لە پەرلەمانی كوردستان لەگەڵ وەزیرەكانیدا سوێندی یاساییان خوارد، دوای ئەوەی كە بە دەنگی زۆرینەی پەرلەمانتاران متمانەیان پێدرا.
لە یەكەم وتاریدا سەرەكوەزیرانی كابینەی نۆیەمی حكوومەتی هەرێمی كوردستان بە چڕوپڕی باسی بەرنامەی چوار ساڵی داهاتووی حوكمڕانی لە هەرێم كرد و ئیشارەتی بەوەدا كە حكوومەت دەبێ هی هەموو خەڵكی كوردستان بێت بێ جیاوازی و وەزارەتەكانیش دووربن لە حزبایەتی و ئەوانیش دەبێ بۆ هەموو خەڵكی كوردستان بن.
هەروەها تیشكی خستەسەر ئەولەویەتی كارەكانی حكوومەت كە لەسەروویانەوە رووبەڕووبوونەوەی دیاردەی گەندەڵییە كە خۆشبەختانە لە هەرێمدا نەبۆتە كەلتوور و دەكرێ بەسەریدا، بە پشتیوانی وەزیر و كاربەدەستانی حكوومەت زاڵ بین و بەرتەسكی بكەینەوە و مۆڵەتی بۆ نەهێڵین و بەرامبەر گەندەڵكارانیش نەرمی نەنوێنین، ئەگەرچی دژایەتی گەندەڵی لە جیهانی سێهەمدا كارێكی هێندە ئاسان نییە، بەڵام بە هەوڵی دڵسۆزان و بە هاوكاری و چاودێری هاووڵاتییان و هۆشیارییان دەتوانین تا رادەیەكی باش ئەم دیاردەیە كەمبكەینەوە و بە یەكجاری لەمەودوا قەڵاچۆی بكەین.
یەكێ لەو كارە گرنگانەی تر كە كابینەی نوێ دەیخاتە ئەستۆی خۆی چاككردنی بژێوی هاووڵاتییانە كە بەهۆی بارودۆخی نالەباری هەرێم دوای هاتنی چەكدارانی داعش و بڕینی بودجە و مووچەی هەرێمی كوردستان هاتنەكایەوە كە لە ئەنجامیدا هەرێم بە ناچاری تووشی قەرزێكی زۆر بوو كە تا ئێستا بە تەواوی لەژێری دەرنەچووە و پێویستە حكوومەتی فیدڕاڵی عێراق ئەو كارە بخاتە ئەستۆی خۆی، چونكە گەر ئەوان مووچە و بودجەی هەرێم و یارمەتی پێشمەرگەیان نەبڕیایە ئەوا حكوومەتی هەرێم تووشی ئەو بارگرانییە نەدەبوو.
لە وتارەكەی بەڕێزیشیاندا ئاماژە بەوە درا كە ئێستا پەیوەندی هەرێم و حكوومەتی عێراقی فیدڕاڵ بەتایبەتی دوای دەستبەكاربوونی د. عادل عەبدولمەهدی كە رۆژ لە دوای رۆژ بەرەو پێشەوە دەچێ و روو لە ئاسایی بوونەوە دەكات بەرز نرخاند و هیوای خواست كە حكوومەتی فیدڕاڵ خاڵە دەستوورییەكان وەكو خۆی جێبەجێ بكات كە تێكڕای خەڵكی عێراق بە هەرێمیشەوە سوودمەند دەبێت لێی.
خهبات