ئەركی پەیامنێری بەرەكانی جەنگ ‌
مسته‌فا ساڵح كه‌ریم‌

* هاوڕێم رۆژنامەنووس رەحمان غەریب لەگۆشەكەی خۆیدا كە ناوی (روونتر)ە لەڕۆژنامەی (هاوڵاتی) ژ 1330 لە 17/6/2014، بەناونیشانی (میدیای عەرشی كەلاوە) بابەتێكی زۆر گرنگیی دەربارەی پاشا گەردانیی هەندێ لەمیدیاكارانی كوردستان لەبەرەكانی جەنگدا وروژاندبوو، ناوەڕۆكی نووسینەكەی وای لێكردم منیش گۆشەی ئەم هەفتەیەم بۆ هەمان مەبەست تەرخان بكەم، بەڵام بەرلەوەی لەوە بدوێم دەمەوێ داوای لێبوردن لەخوێنەرانی گۆشەكەی كاك رەحمان بكەم كە نووسینی (پاشای عەرشی كەلاوە)ی خستبوە پاڵ حسێن عارف و لەواقیعیشدا هی حەمە سەعید حەسەنە، بۆیە من داوای لێبوردنم كرد چونكە پێش بڵاوبوونەوەی نووسینەكەی، كاك رەحمان لەمنی پرسی و منیش راستەوخۆ بێ بیركردنەوە بەتایبەت بیست ساڵ زیاتر بەسەر ئەو نووسینەی كاك حەمە سەعیدا تێپەڕیووە كە لەسوید نوسیبووی بەهی كاك حسێن عارفم زانی، واتە ئەو هەڵەیە من پێم كردووە، بۆیە داوای لێبوردن لەخۆینەران و لەهەرسێ نووسەری بەڕێز دەكەم.

* ئەمجا لەم بارەیەوە ئەوەی مەبەستمە دەمەوێ‌ بیڵێم: پێویستە رۆژنامەنووس لەم حاڵەتانەدا زۆر بەوردی و بەپەرێزەوە مامەڵەی رۆژانە لەگەڵ رووداوەكانا بكات، هەربۆیەشە كە خەسڵەتەكانی پەیامنێری بەرەی جەنگ جیاوازن لەو سیفەتانەی كە دەبێ پەیامنێری بابەتەكانی تر تیایاندا بێ، ئەركی ئەم جۆرە پەیامنێرانە زۆر گرنگەو زۆریش مەترسیدارە، لەوانەیە هەواڵێكی زۆر سادە ببێتە هۆی ورەبەردانی ئەو جەنگاوەرانەی لەسەنگەری شەرەفدا روبەڕووی دوژمنن، هەواڵی ئەوتۆش هەیە بێ‌ ئەوەی پێی بزانین دوژمن سوودی لێ دەبینێ، لەوانەشە ببێتە هۆی روودانی كارەسات، بەڕای هەندێ لەپسپۆڕانی راگەیاندن دەبێ پەیامنێر تەنانەت خۆی لەباسكردنی جۆری چەكی بەكارهێنراویش بەدوور بگرێ، تا دەتوانێ شوێنی سەنگەرو بنەو بارەگایان ئاشكرا نەكات و بەهیچ شێوەیەك وێنەی حەشارگەیان بڵاونەكاتەوە. 

* رۆژنامەنووسی میسریی خوالێخۆشبوو لطفی رضوان دەڵێ: ((دەبێ پەیامنێری بەرەی جەنگ لەڕاپۆرت نووسینا دووربین بێ‌، توانای ئەوەی هەبێ كە بەسەر ئارەزووەكانی خۆیدا زاڵ بێت، واتە حەزو ئارەزوو هەڵپەی بڵاوكردنەوەو دەركەوتن و ناوبانگ دەركردن بخاتە ئەولاوەو بیانكاتە قوربانی بەرژەوەندیی گشتیی)) هەروەها دەڵێ: ((پەیامنێری بەرەی جەنگ دەبێ شارەزای یاساو رێسای سەربازییش بێ، جگە لەوەش پێویستە  لەبەكار هێنانی چەكی سووكەڵەشدا شارەزابێ تا لەكاتی تەنگانەدا بتوانێ خۆی رزگار بكات.))

* ئاشكراشە پەیامنێری بەرەی جەنگ بەرلەوەی رۆژنامەنووس بێ‌ هاووڵاتییەكی نیشتمانپەروەرەو رۆڵەی ئەم خاكەیە، بۆیە دەزانێ‌ چ ئەركێكی پیرۆزی لەسەر شانە، لەبەر ئەوەیە جەخت لەوە دەكەینەوە كە دەبێ پەیامنێرانی میدیای كوردستان جڵەو بۆ ئارەزووەكانی خۆیان شل نەكەن، لەو سنوورەدا كار بكەن كە خزمەتی هێزەكانی پێشمەرگەی كوردستان دەكات، ئەگەر یەكێكیشان رەخنەی هەبوو دەبێ بونیادنەرانە بێ‌ و وەك پێشناز پیشانی بدات نەك بۆ شكست، هەروا بۆ نموونە نازانم ئەمە چ حیكمەتێكی تیایە كە رۆژنامەیەك بەمانشێت پیشانی بدا ((پێشمەرگە لەسەنگەری بەرگریدا تەماتە خواردنی سەرەكییانە))، خاڵێكی تری گرنگ هەیە دەبێ بیخەمە بەرچاو ئەویش ئەوەیە داوا لەلێپرسراوانی سەتەلایت و تەلەفزیۆن و سەرجەم میدیاكان دەكەم، بەتەنگ سەلامەتی رۆژنامەنووسانەوە بن و هەوڵ بدەن نەخرێنە تاڵوكەوە، چونكە ئەوان لەهەموو كەسێ زیاتر لەم ساتانەدا روبەڕووی مەرگ دەبنەوە، وێڕای ئەوەی لەدەستچوونی هەر رۆژنامەنووسێك لەدەستچوونی تواناو لێهاتوویی كەسێكە كە جێی هیوا بووەو شوێنی بەئاسانی پڕ ناكرێتەوە، جگە لەوەی كە سەرگەردان بوونی خێزانێكیشە، بۆیە پێویستە كە دەیان نێرن بۆ ئەم جۆرە كارە پیرۆزانە هەموو هۆكارێكی گەیاندن و پارێزگاری كردنیان و خۆراكیان بۆ دابین بكرێ.

(ئایدن وایت)ی سكرتێری پێشووی یەكیتی رۆژنامەنووسانی نێودەوڵەتی لەبواری پاراستنی گیانی رۆژنامەنوساندا واتەیەكی جوانی هەیە دەڵێ: ((دەمانەوێ رۆژنامەنووس چیرۆكەكانمان بۆ بگێڕێتەوە، نەك خۆی ببێ‌ بەچیرۆك)). 



PM:03:11:27/06/2014