ل هەر دەم و چاخەکی بەحس ل زەحمەتیا ژیانا مرۆڤایەتیێ و رەوشا خراب یا کۆمەلگەها کوردی دهێتە کرن ئێکسەر خەلکێ مە یێ شنگالێ و چاوانیا دەرباسبوونا ژیارا وان یا سەخت و دژوار لبیرا من دهێت و بتایبەت ئەو قوناغێن هەستیار کو ئاستەنگی د کەفتنە پێشیا ئافرەتا شنگالی دە ژ گەلەك بواران ڤە، لەوما ئەڤرۆ ب فەر دبینم کورتیەکێ ژ وێ زەحمەتیێ ل بەرچاڤ بگرم و ئەوێ هەڤرکیا رۆژانە دایکێن مە دگەل کول و کۆڤانا دکر پێخەمەت سەرفەرازیا خێزانا خۆ د وێ رەوشا ئالۆز و دژوار دە ب کورتی بینمە زمان، ئەوژی وەك ئەرکەکی مرۆڤایەتی کو من ژی دناڤ وێ کۆمەلگەهێ دە زەحمەتیا ژیانی ب چاڤێن خۆ دیتی و هەر وەها وەك کەچا شنگالێ ئەڤرۆ د بوارێ مافێ ئافرەتان دە کارێ خۆ دکەم.

هەر ژ دەستپێکا هەبوونا ژیانێ ل دەڤەرا شنگال و ئاکنجیبوونا کوردێن ئیزدی ل وێ دەڤەرێ دوژمن و نەحەزێن مللەتێ کورد ئەو دەڤەر کرنە ئارمانجا کێشە و ئاریشا و نەهێلایە ئارامی لێ پەیدا بێ و خەلکێ وێ خۆشیەکێ ژ ژیانا خۆ ببینن و زۆر جاران کرینە گۆرەپانا ململانێ و شەرو پێکدادان لێ دروستکرینە وتەماکاری ل ئەرد و مال و مولکێ خەلکێ وێ کرینە و رەوشا وان یا جڤاکی تێکداینە، هەموو ژی پێخەمەت دوورکرنا وان ژ ئاخ و وەلاتێ وان بوویە.

دڤێ ناڤبەرێ دە ئافرەتا شنگالی ژی یا دوور نەبوویە ژ ڤان کاودانا و ئێش و ئازار و نە ئارامی هەر بەهرا وێ بوویە و رەوشا وێ هاتیە تێکدان و تۆشی نەهامەتێ بوویە و باجا مەزن هەر وێ دایە، بەلێ سەرەرای هندێ ژی ناچار بوەیە ب خۆراگری تەحەمولا بارگرانیا کاودانا بکەت و روبەروی نەخۆشیا ژیانێ بیە و بسەرفەرازی کەسایەتیا خۆ بپارێزە.

زۆر جارا دیرۆکێ ژی زۆلمەکا مەزن ل ئافرەتا شنگالی کریە و رۆلێ وێ د سەرکەفتنا بارێ خێزانێ و پێشڤەبرنا ئاستێ پەروەردا جڤاکی ل ناڤ کۆمەلگەهێ دە ونداکریە و ژئەگەرێ ڤێ چەندێ تۆشی دەردەسەریێ بوویە و نەگەهشتیە ئارمانجین خۆ وەك ئافرەتەکا ئازا و بخۆشیا ژیانێ شاد نەبوویە.

بێگومان هەر ل دەستپێکا شۆرەشێن بزاڤا رزگاریخوازیا گەلێ کورد ئافرەتا شنگالی خۆراگر بوویە و وەکو نشتیمانپەروەرەك بەرگری ژ خاکێ کوردستانێ کریە و بوویە ئارمانجا سیاسەتا قرێژ یا رژێمێن ستەمکار ل عیراقێ و تۆشی زۆلم و زۆرداریەکا سەخت و دژوار هاتیە، ژبەر کو داخوازا ئازادیا ژیانێ کریە کو ئەو ژی مافێ وێ یێ رەوا بوویە وەك مرۆڤەك دناڤ کۆمەلگەها کوردەواریێ دە، هەر وسا یا بەردەوام بوویە لسەر بیروباوەرێن خۆ یێن ب هێز هەتا کو ئەو هێرشا هۆڤانە ژلایێ رێکخراوا تیرۆرستی یا داعش ڤە هاییە سەر باژێرێ شنگالێ و ئەوان بێ وژدانا ئافرەتا ئیزدی ل شنگالێ کریە ئارمانجا هزروبیرێن خۆ یین پاشڤەمای و بهەزاران کەچ و ژنین بێگونەهـ رەڤاندین و لبازارێ کرین و فرۆتن ب وان کرین، ئەگەر ژ ڤێ چەندێ ئەو بوویە ئافرەتا شنگالی بیروباوەرێن خۆ یێن ئۆلی وەك ئێزدی و نەتەوا خۆ یا کوردی د پاراستن لەوا هەر ژ وێ ئەگەرێ ب هەزاران ئافرەتێن ئازا و سەربلند بوینە قوربانی و وەک دیل و ئێخسیر مانە دناڤ دەستێن وان یێن قرێژدە.

دیسان هەر ژ ئەگەرێ هێرشێن وان یێن بێ وژدان ب هەزاران ئافرەت دگەل خیزانێن خۆ دەربەدەر بوون و ژیانا ب زەحمەتی دناڤ کەمپان دە هەلبژاتن و رەوشا ئاوارەبوونێ و دەردەسەریێ قەبوول کرن و بیروباوەرێن خۆیێن موکوم نەهێلان و خۆ رادەستی ئیرادا زورداریێ نەکرن.

لێ سەرەرایی ڤێ چەندێ ژی ئافرەتا شنگالی هەر مایە جهێ شانازیێ و سەرفەرازیا گەل و مللەتێ خۆ و هیڤیا وێ ژی هەردەم وەلاتەکی ئازاد و کوردستانەکا ئاڤەدانە کو چاڤێن خۆ پێ رۆهنبکەت و ئەو رۆژە ژی یا نیزیكە و ئەم ب ئۆمێدین دێ لسەر دەستێ رێبەرێ گەلێ کورد سەرۆك بارزانی خەونا وێ و هەموو ئازادی خوازێن مللەتێ مە هێتە جی و ئەو هەموو خوشك و دایكێن مە یێن ماین د دەستێن تیرۆرستێن بێ وژدان دە رزگارببن و خەلکێ مە یێ ئاوارە ب سەربلندی ڤەگەرێتە شنگالەکا ئارام و ئاڤەدان.