میترۆ، كەركوك
بەمەبەستی ڕوماڵی قەرەباڵغی بەنزینخانەكانی شاری كەركوك، پەیامنێری (شار پرێس) لەلایەن هێزێكی ئەمنی ئەو شارەوە بۆ ماوەی 45 خولەك دەست بەسەردەكرێت، ئەو پەیامنێرەش رایدەگەیەنێت، كە لەلایەن ئەو هێزەوە سوكایەتیان پێكردووە و دەستیان بەسەر سەرجەم كەلوپەلە ڕۆژنامەوانییەكانیدت گرتووە.
ئاكام سەمەد، پەیامنێری شار پرێس لە كەركوك بە میترۆی راگەیاند، ئەمرۆ بەمەبەستی روماڵی قەرەباڵغی بەنزینخانەكان، چووم بۆ بەنزینخانەی (عەقەبە بن نافع) لەسەر رێگەی بەغداد- كەركوك، بەڵام لەلایەن هێزێكی ئەمنی و كارمەندێكی بەنزینخانەكەوە رێگریم لێكرا و سوكایەتیان پێكردم و دەستیان بەسەر كەلوپەلە رۆژنامەوانییەكاندا گرت.
وتیشی، لەلایەن ئەو هێزە ئەمنییەوە بۆ ماوەی 45 خولەك لەناو بەنزینخانەكە دەستبەسەركراوم.
ئاكام ئاشكراشیكرد، پاش وەرگرتنی بەڵێننامە و سڕینەوەی سەرجەم ڤیدیۆ و فۆتۆكان ئازاد كرام.
ئەوەشی خستەڕوو، كارمەندی بەنزینخانەكە پێی وتووم، ڕۆژنامەنووس هیچ نیە و دەبێت نوسراوێكی ئۆپراسیۆنی كەركوكت پێبێت.