پارێزەرانی دەستگیركراوانی بادینان لە كۆنگرەیەكی رۆژنامەوانیدا لە هەولێر رایانگەیاند، ماددەكەی هەردوو رۆژنامەنووس و چالاكوانی بادینان مامۆستا بەدەل بەرواری و ئومێد بەرۆشكی گۆڕاوە بەماددەی 222 و بە ساڵێك زیندانی سزادران.
وتیشیان: دادگای تاوانەكانی هەولێر ئەو تۆمەتانەی ئاڕاستەی ئەو دوو رۆژنامەنووس و چالاكوانەی كردبوو بەڵگەیان لەبارەوە نەبوو بۆیە دادوەر بڕیاریدا بە ساڵێك زیندانی سزایان بدات.
ئەوەشیان خستەڕوو: دادگا بەتۆمەتی ئەنجامدانی خۆپیشاندان و دروستكردنی چەند گروپێك لە تۆڕە كۆمەڵایەتییەكان ئەو تۆمەتەی بەسەریاندا سەپاند بەڵام، لە راستیدا ئەو تۆمەتانە دوورن لە راستییەوە و هیچ بەڵگەیەكی پێویست لەسەریان نەبوو.
ئاماژەیان بەوەشدا: بەپێی ئەو سزایەی كە دادگا بۆی دیاریكردبوون كە ساڵێك زیندانی بوو لە ئێستادا هەردوو ناوبراو سزاكەیان تەواو كردووە و ئازاد كراون.
ئەمڕۆ سێ شەممە 19-10-2021، دوای چەندین جار دواخستن دادگایی كردنی مامۆستا بەدل بەرواری و ئومێد بەرۆشكی لە دادگایی هەولێر بەڕێوەچوو.
زیاتر لە 14 مانگە نزیكەی 80 رۆژنامەنووس و چالاكوانی بادینان زیندانیكراون، جگە لە بەدەل بەرواری و ئومێد بەرۆشكی تاوەكو ئێستاش كەیسی پێنج لەو دەسگیركراوانە یەكلایی بووەتەوە و بە شەش ساڵ زیندانی سزادراون و ئەوانی دیكە بەشێكیان چەندینجارە دادگایی كردنیان دوادەخرێت و بەشێكی تریان هێشتا دادگایی نەكراون.
PUKmedia تایبەت