ئەمڕۆ یادی 127 ساڵەی دەرچوونی یەکەم رۆژنامەی کوردییە بەناوی کوردستان، نەقیبی سەندیکای رۆژنامەنووسانی کوردستان دەڵێت، زیاتر لە هەزار و 600 دەزگا یان ئامرازی راگەیاندن بە فەرمی لە هەرێمی کوردستان تۆمار کراون.

 

رۆژنامەی کوردستان یەکەم رۆژنامەی کوردی بوو کە یەکەم ژمارەی لە 22-04-1898 لەلایەن بنەماڵەی بەدرخانەکانەوە لە قاھیرەی میسر بڵاوکرایەوە، هەربۆیە ئەو رۆژە رۆژی رۆژنامەگەری کوردیی دیاریکراوە.

 

بەگوێرەی ئاماری سەندیکای رۆژنامەنووسانی کوردستان کە ئەمڕۆ سێشەممە بە رووداوی داوە، هەزار و 618 دەزگای راگەیاندن بە فەرمی تۆمار کراون، کە لە 127 کەناڵی تەلەڤزیۆنیی نێوخۆیی. 30 کەناڵی تەلەڤزیۆنیی ئاسمانی. 179 رادیۆ، هەزار و 10 رۆژنامە و گۆڤار. 145 ماڵپەڕ و 127 پەیجی فەیسبووک.

 

ئازاد حەمەئەمین، نەقیبی سەندیکای رۆژنامەنووسانی کوردستان، ئەمڕۆ سێشەممە بە تۆڕی میدیایی رووداوی گوت: "هەر میدیایەک یان پەیجێکی فەیسبووک لە هەرێمی کوردستان کاربکات دەبێت لەچوارچێوەی رێنوێنییەکاندا مۆڵەت وەربگرێت و خۆی تۆمار بکات".

 

نەقیبی سەندیکای رۆژنامەنووسان گوتی: "ئەو پەیجانەی فەیسبووک کە هەن و مایک و لۆگۆیان هەیە، دەتوانن سەردانی لقەکانی سەندیکا بکەن و مۆڵەت وەربگرتن، هاوشێوەی ماڵپەڕێک کاریان لەگەڵدا دەکرێت".

 

سەندیکای رۆژنامەنووسانی کوردستان لە راگەیێندراوێکدا رایگەیاند: "رژدین لەسەر چاكسازیی لە كاری میدیا لە هەرێمی كوردستان و هەوڵەكانمان بۆ بە پیشەییبوونی كاری رۆژنامەنووسی".

 

ئەمڕۆ هاوکاتیشە لەگەڵ 27ـەمین ساڵیادی دامەزراندی سەندیکای رۆژنامەنووسانی کوردستان، سەندیکاکە لە راگەیێندراوەکەدا دەڵێت: "سەندیكا لەم بۆنەیەدا، ناڕەزایەتی خۆی بۆ دەستگیركردن، شكاندن ‌و رێگریی لە رۆژنامەنووسان بەبیانوی جیاواز دەردەبڕێت ‌و داوا دەكات، بەردەوام ئازادی رادەبڕین ‌و ئازادی رۆژنامەگەری بەدوور بكرێت لە رکابەریی حیزبی".

 

سەندیکای رۆژنامەنووسان داوا دەکات، "یاسای رۆژنامەگەری وەكو دەستكەوتێكی گرنگ پەیڕەوبكرێت ‌و لەم بوارەشدا، لەگەڵ ئاراستەی تەرخانکردنی دادگەی تایبەت مەندین لە تەماشاکردنی کەیسی تایبەت بە رۆژنامەنووسان، بەرەو خۆڕێكخستنی رۆژنامەنووسان، لەچوارچێوەیەكی مەدەنیدا وەك فیدراسیۆنی رۆژنامەنووسانی نێودەوڵەتی بەردەوام داوامان لێدەكات ‌و هاوكارمان بووە".

 

هەر بەبۆنەی ساڵیادی رۆژنامەگەریی کوردییەوە، سەنتەری میترۆ بۆ داکۆکی لە مافی رۆژنامەڤانان، لە راگەیێندراوێکدا داوای کرد: "یادی 127 ساڵە، ببێتە مایەی دروستبوونی ویستێكی راستەقینە بۆ جێبەجێكردنی یاساكانی رۆژنامەگەری و زانیاری و كۆتایهێنان بە دیاردەی دەربازبوون لە سزا، رۆژنامەنووسانیش هیچ ئەركێك لە ئەستۆ نەگرن كە ناكۆك بێت لەگەڵ ئاكاری پیشەكەیاندا".

 

لە بەشێکی دیکەدا سەنتەری میترۆ رایگەیاندووە: "لە دەزگاكانی راگەیاندندا نەبوونی بیمەی كۆمەڵایەتی، كێشەكانی گرێبەستی دادپەروەرانە، خراپتربوونی حاڵەتەكانی دەركردنی رۆژنامەنووسان لەكارەكانیان و دواكەوتن یا پێنەنەدانی موچە، بەردەوامن".

 

بەپێی ئاماری سەنتەری میترۆ، ساڵی رابردوو 182 پێشێلکاری بەرامبەر 176 رۆژنامەڤان و دامەزراوەی میدیایی لە هەرێمی کوردستان تۆمارکراون.

 

سەرچاوە/ ڕووداو