21.7.2025، له یادی حه‌ڤده ساڵ تێپه‌ڕبوون به‌سه‌ر تیرۆركردنی شه‌هیدی قه‌ڵه‌م ڕۆژنامه‌نووس، سۆرانی مامه حه‌مه له كه‌ركوك، له چه‌ند ناوچه‌یه‌كی وڵابه‌ریتانیا مه‌راسیم رێكخرا.
بۆ ئه‌وه‌ی یادی ئه‌و تیرۆره بكه‌نه‌وه و ئیدانه‌ی پێشێلكارییه به‌رده‌وامه‌كانی سه‌ر رۆژنامه‌نووسان بكه‌ن، ڕێكخراوی حه‌ڤده‌ی شوبات بۆ مافه‌كانی مرۆڤ له به‌ریتانیا، مه‌راسیمی له‌به‌رده‌م نوێنه‌رایه‌تی حكومه‌تی هه‌رێمی كوردستان له له‌نده‌ن، له به‌رده‌م باڵیۆزخانه‌ی عێراق له مانجسته‌ر و له شاره‌كانی بێرمینگهام، نیوكاسڵ و هه‌رێمی سكۆتلاندا له شاری گلاسگۆ رێكخست.
ئاوات جه‌مال، به‌ڕێوه‌به‌ری راگه‌یاندنی رێكخراوی 17ی شوبات به وێستگه‌نیوزی وت كه "ئه‌وان له كۆمه‌ڵێك چالاكوان و كه‌سانی ئه‌كادیمی پێك دێن و نوێنه‌رایه‌تی ده‌نگی ناڕازی ده‌كه‌ن، وه پێیان وایه، هێشتا ئه‌و دۆسیه‌یه لای ئه‌وان دانه‌خراوه، چونكه بكوژانی ده‌ستگیرنه‌كراون".
چیرۆكی سۆرانی مامه حه‌مه، هاوشێوه‌یه له‌گه‌ڵ چیرۆكه‌كانی تیرۆكردنی رۆژنامه‌نووسان، سه‌رده‌شت و كاوه و ویدات، كه تۆمه‌تبارانیان ئاشكرانه‌كراوه و نازانرێ كێن.
به‌ڕێوه‌به‌ری راگه‌یاندنی رێكخراوی 17ی شوبات ده‌ڵێت: "دوای تێپه‌ڕبوونی حه‌ڤده ساڵ، ڕۆژ له دوای ڕۆژ كاری ڕاگه‌یاندن و ژیانی ڕۆژنامه‌نووسان له مه‌ترسیدایه و ڕۆژنامه‌نووسان ده‌ستگیرده‌كرێن و ئازار ده‌ده‌رێن بۆیه هه‌موو ئه‌و كارانه و پێشلكاریانه ئیدانه ده‌كه‌ن".
سۆران محه‌مه‌د، ناسراو به سۆرانی مامه حه‌مه له 2-2-1986 له كه‌ركوك له‌دایك بووه، له‌ساڵی 2003 وه كاری رۆژنامه‌گه‌ری ده‌كرد و ئه‌ندامی ده‌سته‌ی نووسه‌رانی گۆڤاری لڤین بوو كه ماوه‌ی سێ ساڵ له‌و گۆڤاره كاری ده‌كرد و به‌رده‌وام راپۆرت و به‌دواداچوونه‌كانی له‌و گۆڤاره داده‌به‌زاند.
له شه‌وی 21ی ته‌مموزی 2008، له‌به‌رده‌م ماڵه‌كه‌ی خۆیدا له لایه‌ن چه‌ند كه‌سێكی نه‌ناسراوه‌وه تیرۆركرا، تا ئێستاش بكوژانی ده‌ستگیرنه‌كراون.
چه‌ند مانگێك به‌ر له شه‌هیدكردنی، سۆران هه‌ڕه‌شه‌ی كوشتنی لێكرابوو، كوشتنه‌كه‌شی به‌دوای چه‌ند وتارێكدا دێن، كه له رۆژنامه و گۆڤاره‌كاندا بڵاوی كردبوونه‌وه.