کۆمیسیۆنی باڵای سەربەخۆی هەڵبژاردنەکانی عێراق دەڵێ، پێویستیان بە 250 هەزار کارمەندە بۆ سەر سندووقی دەنگدان بۆ رۆژی دەنگدانی هەڵبژاردنی پەرلەمانی عێراق.
جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق، ئەمڕۆ یەکشەممە 27ی تەمموزی 2025 بە تۆڕی میدیایی رووداوی راگەیاند، کۆمیسیۆن پێویستی بە 250 هەزار کارمەندی سەر سندووقەکانی دەنگدانە.
پێشکێشکردنی داواکاری بۆ بوون بە کارمەندی سەر سندووقەکانی دەنگدان تاوەکو یەکی مانگی 8 بەردەوام دەبێ و تاوەکو ئێستاش زیاتر لە 750 هەزار کەس داواکاریان پێشکێش کردووە.
گوتەبێژی کۆمیسیۆن گوتی، وەک ژمارەی بەرایی نزیکەی 8 هەزار و 788 ناوەندی دەنگدان بۆ رۆژی هەڵبژاردن هەن، ژمارەی وێستگەکانی دەنگدانیش 40 هەزار و 819 وێستگەیە لەهەموو پارێزگاکانی عێراق، بەڵام ئەمە کۆتایی نییە و رەنگە ژمارەکان بگۆڕدرێن.
لە عێراق نزیکەی 29 ملیۆن کەس مافی دەنگدانیان هەیە، زیاتر لە 21 ملیۆن کەس کارتی بایۆمەتری دەنگدانیان هەیە و دەتوانن دەنگبدەن.
بڕیارە هەڵبژاردنی پەرلەمانی عێراق لە 11ـی تشرینی دووەمی ئەم ساڵ بکرێت. پەرلەمانی عێراق لە 329 کورسی پێکهاتووە 320یان گشتی و 9یەکەی دیکە کۆتان.