ڕونکردنەوەیەک لەدەستەی سەربەخۆی مافی مرۆڤ سەبارەت بە کەیسی سزادانی هاوڵاتی (ئومێد حاجی فتاح) لەلایەن دادگای لیکۆڵینەوەی دهۆک بۆ ماوەی شەش مانگ.
دوای ئەوەی لەلایەن چەند ئەندام پەرلەمانێکی کوردستان پەیوەندی بەبەڕێز سەرۆکی دەستەوە کراو هەروەها لەلایەن هەندێ کەسەوەش هەواڵی ئەوە بڵاو کرایەوە کە هاوڵاتی ( ئومێد حاجی فتاح) ناسراو بەئومێد بەڕۆشکی دوای ئەوەی ماوەی سزادانی ناوبراو تەواو بوە بەڵام دادگای لێکۆڵێنەوەی دهۆک (٦) مانگ ماوەی حوکمی سزادانی بۆ ناوبراو زیاد کردووە.
دەستەی سەربەخۆی مافی مرۆڤ لەسەر ڕاسپاردەی بەڕێز سەرۆکی دەستە بەدوا داچونی کرد بۆ بابەتەکەو تیمێکی نوسینگەی دهۆکی مافی مرۆڤ هاتە سەر خەت لەگەڵ لایەنە پەیوەندیدارەکان و دووجاریش سەردانی چاکسازی گەورانی کردو چاویان کەوت بەبەڕیوەبەرو هۆبەی یاسایی و خودی سزادراویش و لەنزیکەوە دۆسیەکەیان بینی .
لەکۆتاییدا دەرکەوت ڕاستی بابەتەکە بەو جۆرە بوە کە ناوبراو لە ٦/١٢/٢٠٢١ بەپێی بڕیاری دادگای لێکۆڵینەوەی دهۆک بۆ ماوەی شەش مانگ سزادراوە بەڵام بەڕاگرتنی جێبەجێکردنی بڕیارەکە ( وقف التنفیذ) واتە ئەگەر تاوەکو ماوەی سێ ساڵ ناوبراو دووبارە سزادرا لەسەر کەیسێکی تر ئەوە ئەو ماوەیەی شەش مانگەی پێشووتر کە جێبەجێکردنی ڕاگیرابوو دەخرێتەوە بواری جێبەجێکردن.
دیارە لەماوەی ئەو سێ ساڵە ناوبراو تاوانێکی تری ئەنجامداوە بۆیە بەبڕیاری دادگای لێکۆڵینەوەی دهۆک زیندانی کرایەوەو لەبەرواری ٢٨/٧/٢٠٢٥ بەژمارە ( ٩٧/ج٢/٢٠٢٥) دادگا بڕیاری هەڵوەشانەوەی ڕاگرتنی جێبەکردنی (وقف التنفیذ) دەرکردو بڕیاردرا ماوەی سزادانەکەی بۆ بگەڕێتەوە.
ئێمە لەدەستەی سەربەخۆی مافی مرۆڤ بۆ ڕای گشتی ڕادەگەیەنین دوای دڵنیابونەوە لەدەرەنجامی ڕاستی بابەتەکە جەخت دەکەینەوە هیچ کات سڵ ناکەینەوە لەبەدوا داچونمان بۆ هەر کەیس و بابەتێکی پەیوەست بەمافی خەڵک و ناو چاکسازی و گرتووخانەکان و کەیسەکانی تر.
وە بەردەوامیش دەبین لەبەدواداچون و چاودێریەکانمان.
دەستەی سەربەخۆی مافی مرۆڤ لەهەرێمی کوردستان
٣٠/٧/٢٠٢٥