بەڕێوەبەری جێبەجێکاری کۆمپانیای ئۆپن ئەی ئای، لە چاوپێکەوتنێکدا ئاماژەی بەوەکرد، خەڵک باسی هەموو شتێکی کەسییان بۆ چات جی پی تی دەکەن و وەکو چارەسەرکارێکی دەروونی بەکاریدەهێنن، بێ ئاگا لەوەی کە گفتوگۆکانیان لەگەڵ چاتبۆتەکە پارێزراو نین.

سام ئەڵتمان،بەڕێوەبەری جێبەجێکاری ئۆپن ئەی ئای، خاوەنی چات جی پی تی، لە پۆدکاستێکدا وتی:" خەڵک باسی هەموو شتە تایبەتییەکانیان بۆ چات جی پی تی دەکەن".

هەروەها لە درێژەی قسەکانیدا ئاماژەی بەوەکرد :"ئەگەر لەگەڵ چارەسەرکارێکی یان پارێزەرێک یان پزیشکێک قسە بکەیت دەربارەی ئەو کێشانە، مافێکی یاسایی هەیە بۆ پاراستنی نهێنییەکان و گفتوگۆکان، بەڵام ئێمە هێشتا نازانین چۆن ئەمە بۆ چات جی پی تی بکەین، کاتێک قسەی لەگەڵدا دەکەیت".

سام ئەڵتمان، لە پۆدکاستەکەدا وتیشی، کاتێک باس لەم گفتوگۆ هەستیارانە دەکرێت،  پیشەسازیی ژیریی دەستکرد هێشتا رێگایەکی نەدۆزیوەتەوە کە چۆن نهێنیی بەکارهێنەر بپارێزێت.

لە وەڵامی پرسیارێکدا سەبارەت بە چۆنیەتی کارکردنی ژیریی دەستکرد لەگەڵ سیستمی یاسایی ئەمڕۆدا، ئەڵتمان وتی یەکێک لە کێشەکانی نەبوونی چوارچێوەیەکی یاسایی یان سیاسەتێکی تایبەت بۆ ژیریی دەستکرد ئەوەیە کە هیچ پاراستنێکی یاسایی بۆ گفتوگۆکانی بەکارهێنەران نییە.

ئەڵتمان نەیشاردەوە کە ئەمە دەتوانێت ببیتە مایەی نیگەرانیی بەکارهێنەران لە حاڵەتی داوای یاساییدا، چونکە ئۆپن ئەی ئای بە شێوەیەکی یاسایی پێویستە گفتوگۆکان پێشکەشی دادگا بکات ئەگەر داوای لێبکرێت.