ئامادەكردنی، میترۆ ميديا : جارێ بەشداربووانی تۆڕە كۆمەڵایەتییەكان لە عێراق لەژێر شۆكی بڵاوكردنەوەی وێنەی ناو مۆبایلەكەی زەینەب جواد بوون، كە ئەمنی حەشدی شەعبی دزەیان پێكرد، ڤیدۆییەكی پێشكەشكاری ستۆدیۆی9 ی كەناڵی ئەلبەغدادیە دزەی پێكرا، ئەمە دووهەمین پرۆسەی دزە پێكردنە لەماوە یەك هەفتەدا، كە چالاكوان و رۆژنامەنووس بە ئامانج دەگرن.
ڤیدیۆ دزە پێكراوەكەی میدیاكار عەلی زەبحاوی، لەناو ئۆفیسێك كە دەوترێت لەناو دەزگای هەواڵگری عێراقە، لەبەردەم مێزیكدا لەسەر كورسییەك بەرامبەر ئەفسەرێكی هەواڵگری دانیشتوە قسە دەكەن، بڕە پارەیەك لە زەرفێكدا وەردەگرێت، گوایە وەك موچەیەكی مانگانە، لە بەرامبەر پێدانی زانیاری سەبارەت بە چالاكوانانی تشرین و لیژنەكانی هەماهەنگی ئەو بزوتنەوە ناڕازییە.
پاشان عەلی زەبحاوی لەوەڵامی ڤیدیۆ دزەپێكراوەكەدا هێرشێكی توندی كردە سەر دەزگای هەواڵگری عێراق، لەسەر ئەو گرتە ڤیدیۆییە دزەپێكراوەی كە دەیانەوێ بیسەلمێنن"مانگانە مووچە لەو دەزگایە وەردەگرێت" ووتی: هۆكاری ئەم كارە پەیوەندی بە هەڵوێستەكانمەوە هەیە،چونكە ڕێككەوتنی خۆر عەبدوڵام ڕەتكردەوە. بەبێ ئەوەی هیچ ڕوونكردنەوەیەك لەبارەی وردەكاری ئەو رووداوە بخاتە روو، وەڵامەكەی هێرشی توندو توڕەبوونی زۆری پێوە دیاربوو، داوای یاسایی لەسەر ئەو دەزگایە تۆمار كردوە.
پاش دزەپێكردنی گرتە ڤدیۆییەكەی ئەو میدیاكارە، بابەتەكە زیاتر تەنەشەنەی سەند و ئێوارەی پێنجشەممە31ی تەمووز، هێزێكی ئەمنی هەڵیكوتایە سەر ئۆفیسی سەرەكی كەناڵی ئەلبەغدادیە، لە شەقامی ئەلسەعدون لە ناوەڕاستی بەغدا. دەستیان بەسەر كەرەستەی تەكنیكیدا گرت و حەوت لە كارمەندانی كەناڵەكەیان بردووەتە شوێنێكی نادیار.
عەلی محمد نعمە ناسراوی بە (عەلی ئەلزەبحاوی) پێشكەشكاری بەرنامەی ستۆدیۆی نۆی كەناڵی ئەلبەغدادیە، لە ساڵی 2007 بڕوانامەی بەكالۆریۆسی لە یاسا لە زانكۆی كوفە و لە ساڵی 2016 بڕوانامەی ماستەر لە یاسا لە زانكۆی مەنسوورەی میسر و دكتۆرای لە یاسا لە زانكۆی ئەلزەقازیقی میسر لە ساڵی 2019 بەدەستهێناوە.
كەناڵی ئەلبەغدادیە ساڵی لە ساڵی 2005 سەرمایەداری دیاری عێراقی (عەون ئەلخشلوك) دایمەزراند، پاشان پەرەی سەندووە و بووە بە گروپێكی میدیایی گەورە.