توێژینەوەیەکی نوێی تۆڕی ڕۆژنامەنوسانی نێودەوڵەتی Ijnet ئاشکرای دەکات کە خەڵەتاندن بە بەکارهێنانی سەرچاوەی ڕاستەقینە بووەتە ئامرازێکی مەترسیدار بۆ شێواندنی ڕاستیەکان و گومڕاکردنی ڕای گشتی لە جیهانی ڕاگەیاندندا .
پێچەوانەی دروستکردنی زانیاری هەڵە لە بنەڕەتەوە ، لەم شێوازەدا بەڵگەیەک کە لە بنەڕەتدا ڕاستە وەکو گرتەی تۆمارکراو ، وێنە یان لێدوانی بەرپرسێک بەکاردەهێنرێت ، بەڵام بە مەبەست لە چوارچێوە و ناوەڕۆکی ڕەسەنی خۆی دەردەکرێت تا ڕاستیەکان بە لایەکی دیکەدا ببرێن ، ئەم جۆرە شیواندنە زیاتر لە ڕێگەی بڕینی بەشێک لە وتەکان ، تێکەڵکردنی وێنە و گرتەی ڕاست لەگەڵ دەقی هەڵە ، یان گواستنەوەی لێدوانی کۆن بۆ کات و شوێنی جیاواز ئەنجام دەدرێت .
شارەزایانی پشکنینی زانیاری جەخت دەکەنەوە کە لە سەردەمی ئێستادا ، تەنها دڵنیابوونەوە لە ڕاستی سەرچاوەکە بەس نییە بەڵکو لێکۆڵینەوە لە چۆنیەتی بەکارهێنانی ئەو سەرچاوەیە لە چوارچێوەی ڕاستی خۆییدا مەرجی سەرەکییە بۆ بەرگریکردن لە زانیاری چەواشەکار.
ئا: لەنیا کامیل