بەناوی سەنتەری میترۆوە سەری رێز و وەفا بۆ هاوڕێ و هاوپیشەمان سۆرانی مامە حەمەو سەرجەم شەهیدانی تری ئازادی رۆژنامەنوسی دادەنەوێنین. پێیان دەڵێن تیرۆر و هەڕەشە نامانترسێنن و بەردەوام دەبین لە گەیاندنی پەیامی راستگۆیی و پیشەیی خۆمان. پەیمانیان دەدەینێ كە تا یەكلاكردنەوەی كەیسەكانیان بەردەوام یادیان زیندوو رادەگرین.

تێپەڕبونی زەمەن بە سەر رووداوی تیرۆری سیاسی و تیرۆر لەسەر ئازادی بیروڕا و ئازادی رۆژنامەنوسی، ساڵێك بێت یان سەدەیەك، مانای سڕینەوەی رووداوەكە ناگەیەنێت لە یادەوەری گشتیدا. ئەوەی خەمی ئێمەو ئێوەو خانەوادەی سۆرانی مامە حەمە رەنگە كەمتر بكات، گەڕانەوەی ماف بۆ خاوەن ماف، بینینی تاوانبارانی راستەقینەیە لەبەردەم دادگایەكی عادیلانە.

تا كات بەسەر ئەم رووداوانە تێپەڕن، پرسیاری زیاتر لەسەر دامەزراوەی جێبەجێكار دەوروژێت. گومانی زیاتریش لەسەر سەربەخۆیی سیستەمی دادوەری دروست دەبن.

بەرێزان،

پاش 34 ساڵ بەسەر راپەرینی هەرێمی كوردستان و 22 ساڵ بەسەر روخانی رژێمی بەعس دەبوایە دادگاكانی هەرێمی كوردستان، كەیسەكانی ئازادی رادەربڕین و ئازادی رۆژنامەنووسی لە بەرژەوەندی عەدالەت و مافی ئازادی قسەكردن و نوسین یەكلابكاتەوە.

ئەمساڵ لە كاتێكدا ئەم یادە  دەكەینەوە، كە سەرباری كێشەی قوڵی كۆمەڵایەتی و سیاسی و ئابوری لە هەرێمی كوردستان، ئاستەنگەكانی بەردەم ئازادی رادەربرین و ئازادی میدیا و ئازادی خۆپیشاندان پەرەدەسێنێت و هێزی ئەمنی لە هەرێمی كوردستان دەست ناپارێزن لە پەیامنێر و وێنەگەران . كە دەیانەوێت رەخنەی هاوڵاتیان بەرامبەر دەسەڵاتی سیاسی بگوازنەوە. هەروەها دڵرەقانەو بە زەبری هێز وەڵامی داواكاری رەوای خۆپیشاندەران دەدرێتەوەو بە فیشەكی زیندوو خۆپیشاندەر شەهید دەكرێت، وەك ئەوەی لە شارەدێ وەرتێ رویدا.

هاوكات داوایش دەكەین بۆ ئەوەی میدیا رۆڵ و  كاریگەری لە پرۆسەی گۆڕانی كۆمەڵایەتی و گەشپێدانی وڵات هەبێت و چاودێری كارەكانی حكومەت هەبێت، پێویست بوو حكومەتی هەرێمی كوردستان ژینگەیەكی لەبارو ئارام بۆ كاری رۆژنامەنووسان بڕەخسێت و ئازادانە زانیاری دروستیان بدرێتی، چونكە ئازادی میدیا و زانیاری راست و بێ لایەن زامنی ئەوە دەكەن كە هاوڵاتیان ئازادانە بژاردەی خۆیان هەبێت.

بەم بۆنەیەوە میترۆ سەرلەنوێ داوا لە دامەزراوەی دادوەری هەرێمی كوردستان دەكات، "تێهەڵچونەوە بۆ كەیسی رۆژنامەنوسان و چالاكوانە حوكمدراوەكان بكات و ئازاد بكرێن." هەروەك داواشدەكات، "سەرلەنوێ لیكۆڵینەوەی نوێ لە كەیسی رۆژنامەنووسانی تیرۆركراو، سۆرانی مامە حەمە، مامۆستا عەبدولستار و سەردەشت عوسمان، كاوە گەرمیانی، ویدات حسێن بكات، بە شێوەیەك دادوەری تەواو زامنبكرێت، تاوانبارانی ئەو كەیسانە دەربازیان نەبێت لە سزای رەوا."