ئەمڕۆ، سێشەممە، 19ی ئابی 2025، تیمی سەنتەری میترۆ پێشوازی كرد لە (كاروان گەزنەیی) گووتەبێژی یەكێتی نیشتمانی كوردستان.
تیمی سەنتەری میترۆ پیرۆزباییان لە گەزنەیی كرد بە بۆنەی دەست بەكاربوونی و هەمووان هیوای سەركەوتنیان بۆ خواست لەم ئەركە نوێیەیدا لەناو یەكێتی نیشتمانی كوردستان.
سەردانەكەی گووتەبێژی یەكێتی نیشتمانی كوردستان دەرفەتێك بوو بۆ قسەكردن لەسەر دەرفەت و ئاستەنگەكانی بەردەم ئازادی كاری رۆژنامەنووسان. هەروەها مامەڵەی گووتەبێژی پارتە سیاسییەكان و گەڕان بۆ باشترین میكانیزمی پەیوەندی لەگەڵ دەزگاكانی میدیا بەبێ جیاوازی بە ئامانجی پێدانی زانیاری بۆ هاوڵاتیان.
كاروان گەزنەیی لە حوزەیرانی 2025 بە بڕیاری بافڵ تاڵەبانی، سەرۆكی یەكێتی نیشتمانی كوردستان، لە جێگەی سەعدی ئەحمەد پیرە، كرا بە گووتەبێژی یەكێتی.
كاروان گەزنەیی، لە هەولێر لەدایكبووە و بڕوانامەی ماستەری لە سیاسەت و پەیوەندییە نێودەوڵەتییەكاندا هەیە، ئەندامی پێشووی پەرلەمانی كوردستان بووە و گووتەبێژی لیستی یەكێتی بووە بۆ هەڵبژاردنی خولی شەشەمی پەرلەمانی كوردستان، لە خولی پێنجەمی پەرلەمانی كوردستان، جێگری لیژنەی پەیوەندییەكان و ڕەوەندی كوردستان و ئەندامی لیژنەی وزە و سامانە سروشتییەكان و پیشەسازی و بازرگانی بووە.