ئەمڕۆ، ٢١ی ئابی ٢٠٢٥، تیمی سەنتەری میترۆ پێشوازی لە وەفدێکی نێردەی نەتەوە یەکگرتووەکان بۆ هاریکاری عیراق کرد کە پێک هاتبوون لە، زەفیرئەلدین، بەرپرسی پێشکەوتووی ئۆفیسی مافەکانی مرۆڤ، زیتو سیانی، بەرپرسی مافەکانی مرۆڤ، کەمال تەها، ئەندامی ئۆفیسی مافەکانی مرۆڤ.
لە سەرەتای کۆبوونەوەکەدا، دیاری محەمەد بەڕێوبەری سەنتەری میترۆ، دەستخۆشی لە یۆنامی کرد بۆ دەربڕینی نیگەرانی خۆیان سەبارەت بە کەیسی ڕۆژنامەنووس شێروان شێروانی و سوپاسی هەڵوێستیانی کرد. هەروەها، دەرفەت ڕەخسا بۆ باسکردنی ئاڵنگارییەکانی بەردەم ئازادی ڕۆژنامەنووسی لە هەرێمی کوردستان.
بەرپرسی پێشکەوتووی ئۆفیسی مافەکانی مرۆڤ سوپاسی پێشوازییەکەی سەنتەری میترۆی کرد و گووتی، "میترۆ لەو ڕێکخراوانەیە کە دەتوانیت پشتی پێ ببەستیت لە ڕاستگۆیی و بەردەوامییان لە کارەکانیاندا." هەروەها، ڕایگەیاند کە داکۆکی لە مافی ڕۆژنامەنووسی یەکێکە لە پێنج ئەولەویاتەکانی کارەکانی یونامی.
یونامی لە بەیاننامەکەیدا کە ئەمڕۆ سەبارەت بە کەیسی دووبارە دادگایی کردنەوەی شێروان شێروانی بڵاویکردۆتەوە، دەڵیت، "حکومەتی هەرێمی کوردستان پێویستە سەروەریی یاسا و مافەكانی مرۆڤ بپارێزێت و داواش لە دەسەڵاتدارانی هەرێمی کوردستانیش دەکات کە دڵنیا بن لەوەی کە دادگاییکردنی تاوانباران بەشێوەیەکی ڕوون و ڕەوا و بەگوێرەی پێوەرە نێودەوڵەتییەکان بەرێوە بچێت."
پاشان، شایی ئاسۆ، ڕێکخەری تۆڕی هاوپەیمانی ١٩، داتای نارەزایەتییەکانی حەوت مانگی سەرەتای ساڵی ٢٠٢٥ی بۆ خستنە ڕوو. گووتی، "لەم حەوت مانگەدا، ٢٦٠ نارەزایەتیمان تۆمارکردووە لە هەرێمی کوردستان کە ١٠٧ کەسی تێدا دەستگیرکراوە و ٢ ڕفێنراون و هێرشکراوەتە سەر چالاکوانیک و هاوڵاتییەکیش کوژراوە." جەختیشی کردەوە، "ئومێد نییە کە ئەو بابەتانەی نارەزایەتییان لەسەرە چارەسەر بکرێن، بۆیە بڕوامان نییە کە ژمارەی ئەو ناڕەزایەتییانە کەم بکەن. لەگەڵ ئەوەشدا، بوونی ئەم نارەزایەتییانە دەرخەری هۆشیاری کۆمەڵگەیە بەرانبەر بە مافەکانیان."
لە کۆتایی کۆبوونەوەکەدا، زەفیرئەلدین، بەرپرسی پێشکەوتووی ئۆفیسی مافەکانی مرۆڤ، ڕایگەیاند کە ژمارەی ناڕەزایەتییەکان ترسناکن و دەبێت کێشە سەرەکییەکە چارەسەر بکرێت بۆ گەیشتن بە دۆخێکی ئارام لە هەرێمی کوردستاندا.
هەروەها، دڵخۆشی خۆی ڕاگەیاند بە بوونی تۆڕێک کە چاودێری مافی ئازادی رادەربرین دەکات و نارەزایەتی و پێشێلکارییەکان تۆمار دەکات. لەگەڵ ئەوەشدا، هیوای خواست کە لە داهاتوودا کاری هاوبەش هەبێت لە نیوانیاندا.