پاش نیوەڕۆی ئەمڕۆ، پێنج شەممە، 28ی ئابی 2025، تیمی سەنتەری میترۆ پێشوازییان كرد لە پارێزەر رێزان شێخ دلێر ئەندامی پێشووی ئەنجومەنی نوێنەرانی عێراق و چالاكوانی بزوتنەوەی مافی ئافرەتان.

لە دیدارەكەدا، هاوڕابووین لەسەر ئەوەی كە بڵاوكردنەوەی دانپێدانانی ڤیدیۆیی تۆمەتباران لە دۆسیەی شەرە خوێناوەییەكەی گەرەكی گردی سەرچناری شاری سلێمانی كە لە قۆناغی لێكۆڵینەوەدایە و پەخشكردنی لە تەلەفزیۆن پێش بڕیاری كۆتایی دادگا، گریمانەی بێتاوانیی تۆمەتبار پێشێل دەكات كە لە مادەی 19ی دەستووری عێراق گەرەنتی كراوە، تێیدا هاتووە "تۆمەتبار بێتاوانە تاوەكو بە بڕیاری كۆتایی دادگا تاوانەكەی دەسەلمێنرێت"

سەرباری ئەوەش، بڵاوكردنەوەی وردەكارییەكانی لێكۆڵینەوە (لەوانەش دانپێدانان) بە پێشێلكردنی نهێنی لێكۆڵینەوەكە هەژمار دەكرێت و كاریگەری لەسەر یەكپارچەیی دانیشتنەكان دەبێت و لەگەڵ جاڕنامەی جیهانی مافی مرۆڤ یەكناگرێتەوە،  كە دەڵێت، "هەر كەسێك تۆمەتباركراوە بە تاوانێكی سزایی، مافی ئەوەی هەیە بە بێتاوان بزانرێت تاوەكو بەپێی یاسا تاوانەكەی دەسەلمێنرێت لە دادگاییكردنی گشتیدا، كە تێیدا هەموو گەرەنتییەكی پێویستی بۆ بەرگریكردن لە خۆیدا هەبووە".

هەروەها، باس لە دەنگدانی ئەنجومەنی نوێنەرانی عێراق كرا كە تیایدا ڕەزامەندی دەربڕی لەسەر خستنەڕووی یاسای شەرعی بڕگەكانی فیقهی جەعفەری تایبەت بە یاسای باری كەسی، كە لەلایەن فەرمانگەی ئەوقافی شیعەوە نێردراوە.

 نیگەرانین لەو دەنگدانە بە تایبەتیش دەنگدانی نوێنەرانی پارتی و یەكێتی و نەوەی نوێ بەو رێسا دواكەوتووە كە مافی ژنان و مناڵان پێشێل دەكات.