(جانێت ئەلبێردا) باڵیۆزی شانشینی هۆڵەندا، خۆشحاڵی خۆی بۆ بەردەوامبوونی كارەكانی سەنتەری میترۆ لە بواری ئازادی رادەربڕین و رۆژنامەگەری دەربڕی و هیوای خواست بەردەوام لە گەشەكردندا بن.
ئێواری ئەمڕۆ 26ی تشرینی دووهەمی 2025، تیمی سەنتەری میترۆ پێشوازییان كرد لە (جانێت ئەلبێردا) باڵیۆزی شانشینی هۆڵەندا لە عێراق، (لێیكە بڕاند) بەرسی سیاسی.
(جانێت ئەلبێردا) باڵیۆزی شانشینی هۆڵەندا، ووتی پەیوەندیمان لەگەڵ سەنتەری میترۆ چ لەماوەی كاركردنم لە كونسڵخانەكەمان لە هەولێر و چ ئێستا كە وەك باڵیۆز كاردەكەم، هەر بەردەوام بووە، خۆشحاڵی خۆی بۆ بەردەوامبوونی كارەكانی سەنتەری میترۆ لە بواری ئازادی رادەربڕین و رۆژنامەگەری دەربڕی و هیوای خواست بەردەوام لە گەشەكردندا بن، هەروەك خۆشحاڵە كە لەگەڵ نوێنەرانی هەندێك لە دەزگای میدیای كۆدەبێتەوە.
رێكخەری سەنتەری رەحمان غەریب بەخێرهاتنی كردن، باسی لە ئامادەكارییەكانی میترۆ كرد بۆ راگەیاندنی راپۆرتی رەوشی ئازادی رۆژنامەگەری بۆ ساڵی 2025 كە تیایدا سەنتەری میترۆ وەك رێكخراوێكی كۆمەڵگەی مەدەنی چاودێر بەسەر جێبەجێكردنی یاساكانی رۆژنامەگەری، مافی زانیاری و تۆماری پێشێلكارییەكانی كردوە، هەروەها راپۆرتێكی رەوشی ئازادی رادەربڕین كە بۆ یەكەمین جار تۆڕی هاوپەیمانی19 ئامادەیان كردوە.
لەو دیدارەدا كە نوێنەرانی ، زووم تیڤی، كەی ئێن ئێن، ئاوێنە، سایتی خەندان، سایتی وێستگە نیوز، ئامادەی بوون، هەر یەك بە جیا باسییان لەچەند بابەتێك كرد كە پەیوەندیدار بوون بەكاری رۆژانەو ئاستەنگەكانی بەردەم جێبەجێكردنی یاسای رۆژنامەگەری لە هەرێمی كوردستان، یاسای مافی دەستكەوتنی زانیاری.
دیاری محمد بەڕێوەبەری سەنتەری میترۆ تیشكی خستە سەر ژینگەی هەڵبژاردنەكان و پێشێلكردنەكانی یاساو رێسكانی هەڵبژاردن كە لە راپۆرتەكانی چاودێری رێكخراوەكانی كۆمەڵی مەدەنی تیشكی خراوەتە سەر.