بڕیاردەری هەڵوێست سەردانی سەنتەری میترۆ دەکات




ئەمڕۆ، 19ی تشرینی دووەمی 2026، تیمی سەنتەری میترۆ پیشوازییان لە عەلی حەمە ساڵح، بڕیاردەری ڕەوتی هەڵوێستی نیشتیمانی کرد.
دیدارەکە دەرفەتێک بوو بۆ گفتوگۆ لەسەر بارودۆخی گشتی و ئەوەی کە پەیوەندیدارە بە ژینگەی کاری ڕۆژنامەگەری و ئازادی بیروڕا و ڕەخنەگرتن لە هەرێمی کوردستان. 

لە کۆبوونەوەکەدا، کە لە بەشێکیدا ڕۆژنامەنووس محەمەد نوری ئامادە بوو، هاوڕا بووین لەسەر ئەوەی کە پڕۆسەی چاودێری و ڕەخنەگرتن لە ئەدای حکومڕانی لە هەرێمی کوردستان بە ئامانجی لێ پرسینەوە ئەرکێکی گرنگە. لەم ڕوانگەیەوە، بڕیاردەری ڕەوتی هەڵوێست، عەلی حەمە ساڵح، پشتیوانی خۆی بۆ ئەرکی سەنتەری میترۆ و تۆڕی هاوپەیمانی ١٩ دەربڕی و داوای کرد تیمی میترۆ بەردەوام بێت لە ئەرکی چاودێری کردنی ئەدای حکومڕانی لە هەرێمی کوردستان.

لەو دیدارەدا کە زیاتر لە سێ کاتژمێری خایاند، ئامادەبووان دەیان پرسیاریان دەربارەی بارودۆخی گشتی و ئەدای ئۆپۆزسیۆن و پرسی شەفافیەت و دیموکراسی ئاڕاستەی بڕیاردەری هەڵوێست کرد و ئەویش ڕاشکاوانە وەڵامی دانەوە.

ڕێکخەر و تیمی سەنتەری میترۆ بە گەرمی پێشوازییان لە بڕیاردەری هەڵوێست کرد و سوپاسی سەردانەکەیان کردن و هیوای سەرکەوتنیان بۆ خواستن لە کار و چالاکییەکانیاندا.


PM:03:36:19/11/2026




ئه‌م بابه‌ته 96 جار خوێنراوه‌ته‌وه‌‌