ئەمڕۆ رێوڕەسمی بەخاکسپاردنی تەرمی شاژنە ئێلیزابێزی دووەم، شاژنی پێشووی بەریتانیا بەڕێوەدەچێت و تێیدا زیاتر لە 2 هەزار سەرکردە و کەسایەتیی جیهان بەشدار دەبن؛ یەکێك لەوان نێچیرڤان بارزانی، سەرۆکی هەرێمی کوردستانە.

 

تەرمی شاژنە ئێلیزابێز کاژێر 7:30ی ئێوارە بە کاتی هەولێر لە قەڵای ویندسۆر لە لەندەن لە تەنیشت گۆڕی شازادە فیلیپی هاوژینییەوە بەخاک دەسپێردرێت، ئەوەش دوای 10 رۆژ ماتەمینی لەو وڵاتە بەهۆی کۆچی دواییەوە. 

 

رێوڕەسمەکە لە هۆڵی وێستمنستەر ئابی، باڵەخانەی کۆنی پەرلەمانی بەریتانیا بەڕێوەدەچێت کە تەرمی شاژنی کۆچکردووی تێدایە.

 

نێچیرڤان بارزانی، سەرۆکی هەرێمی کوردستان یەکێکە لەو سەرۆکانەی جیهان کە لەلایەن شا چارلسی سێیەم، شای بەریتانیاوە بانگهێشتکراوە.

 

یەکشەممە 18-9-2022، نێچیرڤان بارزانی و سەدان سەرۆک و سەرۆکوەزیران و کەسایەتیی دیکەی دیاری جیهان لە کۆشکی بەکینگهام بەشدارییان لە رێوڕەسمی دوا ماڵئاوایی لە شاژنی بەریتانیا کرد و ئەمڕۆ دووشەممەش بەشداری لە رێوڕەسمی بە خاکسپاردنیدا دەکەن.

 

سەرۆکە بانگهێشتکراوەکان

 

هەرێمی کوردستان

 

نێچیرڤان بارزانی، سەرۆکی هەرێمی کوردستان لەلایەن شا چارلسی سێیەمەوە بانگهێشتی رێوڕەسمەکە کراوە.

 

پەیوەندیی بەهێزی هەرێمی کوردستان لەگەڵ بەریتانیا لەم چەند ساڵەی رابردوودا بەهێزتر بووە. نێچیرڤان بارزانی رۆڵی دیاری لە بەرەوپێشبردنی ئەو پەیوەندییانەدا هەبووە. لە ئەیلوولی رابردوودا سەرۆکی هەرێمی کوردستان سەردانی بەریتانیای کرد و لە لەندەن لەگەڵ بۆریس جۆنسن، سەرۆکوەزیرانی ئەو کاتی بەریتانیا، لیز ترەس، وەزیری دەرەوەی ئەو کاتی وڵات و سەرۆکوەزیرانی ئێستا و چەندین وەزیری دیکەی ئەو وڵاتە کۆبووەوە. 

 

کاروان جەمال تاهیر، نوێنەری حکومەتی هەرێمی کوردستان لە بەریتانیا رۆژی یەکشەممە 18-9-2022 بە رووداوی راگەیاند، بەریتانیا دەیەوێت هەرێمی کوردستانێکی بەهێز لە چوارچێوەی عێراقی فیدراڵیدا هەبێت.

 

ویلایەتە یەکگرتووەکانی ئەمریکا و ئەڵمانیا و فەرەنسا 

 

جۆ بایدن، سەرۆکی ئەمریکا و جێل بایدنی هاوژینی بانگهێشتی رێوڕەسمەکە کراون.

ئەڵمانیا

 

فرانک والتەر شتاینمایەر، سەرۆکی ئەڵمانیا بەشداری لە رێوڕەسمەکە دەکات لە کاتێکدا ئۆلاف شوڵتز، راوێژکاری وڵات ناچارە رێوڕەسمەکە لە رێگەی تەلەڤزیۆنی ماڵەکەی لە ئەڵمانیا ببینێت.

 

فەرەنسا

 

کۆشکی ئێلیزێ، کۆشکی سەرۆکایەتیی فەرەنسا راگەیێندراوێكی بڵاوکردەوە و تێیدا جەختی لە پەیوەندیی "نەپچڕاوی" فەرەنسا و بەریتانیا کردەوە و رایگەیاند: ئیمانوئێل ماکرۆن، سەرۆکی فەرەنسا بەشداری لە رێوڕەسمەکە دەکات.

یەکێكی دیکە لەو کەسایەتییانەی کە ئامادەبوونیان لە رێوڕەسمەکە بۆ بەریتانیا گرنگە، مایکل مارتن، سەرۆکوەزیرانی ئێرلاندایە.

 

لەنێوان بەریتانیا و ئێرلاندا مێژوویەکی خوێناوی کۆن هەیە کە دواجار بە جیابوونەوە و سەربەخۆیی ئێرلاند کۆتاییهات.

شاژنە ئێلیزابێزی دووەم لە ساڵی 2011دا وەک یەکەمین شاژنی بەریتانیا سەردانی ئێرلاندی کرد کە بە هەوڵی پاشایەتی بەریتانی بۆ داخستنی لاپەڕەی کۆن و هەڵدانەوەی لاپەڕەیەکی نوێ دانرا.

 

وڵاتانی کۆمۆنوێڵس

 

سەرکردەکانی وڵاتانی کۆمۆنوێڵس بەشداری لە رێوڕەسمەکە دەکەن.

 

14 وڵات لە ئەندامانی کۆمەڵەی کۆمۆنوێڵس بە فەرمی دانیان بە سیستمی پاشایەتی بەریتانیادا ناوە و شای بەریتانیا بە شای وڵاتەکانیان دەزانن. جگە لەو 14 وڵاتە، 39 وڵاتی دیکەی ئەندامی کۆمۆنوێڵس هەن کە بە فەرمی بە سیستمی شاهانەی بەریتانیا نەبەستراونەتەوە، بەڵام پەیوەندی مێژوویی، زمان، کولتوور، ئابووری و بەرگریکردن لە بەها دیموکراتییەکان کۆیان دەکاتەوە.

سەرۆک و  سەرۆکوەزیرانی هەر 14 وڵاتەکەی کۆمۆنوێلس بەشداری لە رێوڕەسمەکەدا دەکەن، دیارترینیان جەستن ترودۆ، سەرۆکوەزیرانی کەنەدا، ئەنتۆنی ئالبانێز، سەرۆکوەزیرانی ئوسترالیا و جاسیندا ئاردێرن، سەرۆکوەزیرانی نیوزیلاندن.

 

سەرۆکە بانگهێشتنەکراوەکان

 

ڤلادیمیر پووتین، سەرۆکی رووسیا

 

بەهۆی هێرشە سەربازییەکەی رووسیا بۆسەر ئۆکراینا، بەریتانیا بانگهێشتی پووتینی نەکردووە.

 

ئیبراهیم رەئیسی، سەرۆککۆماری ئێران

 

سەرۆککۆماری ئێران بانگهێشتی رێوڕەسمەکە نەکراوە. لە ساڵی 1979ەوە پەیوەندییەکی بەهێزی دیپلۆماسی لەنێوان هەردوو وڵاتدا نییە. 

 

کیم جۆنگ ئوون، سەرۆکی کۆریای باکوور

 

سەرەڕای دروستکردنەوەی پەیوەندییەکانی لەگەڵ پیۆنگیانگ لە ساڵی 2000ەوە، لەندەن بانگهێشتی  کیم جۆنگ ئوونی نەکردووە.

 

ئەفغانستان

 

کۆماری ئیسلامی ئەفغانستان داننانی کۆمەڵگەی نێودەوڵەتی بەدەستنەهێناوە؛ بۆیە بەریتانیا هیچ سەرکردەیەکی ئەو وڵاتەی بانگێشتنەکردووە.

 

میانمار

 

بەهۆی تۆمەتبارکردنی بە پێشێلکردنی مافەکانی مرۆڤ، دەسەڵاتی سەربازی ئەو وڵاتە بانگهێشتی رێوڕەسمەکە نەکراوە.

 

شی جی پینگ، سەرۆکی چین

 

پەیوەندیی ئاڵۆزی بەریتانیا و چین بە تایبەتی لەسەر پرسی دوورگەی تایوان وایکرد شی جین پینگ، بەشداری لە رێوڕەسمەکە نەکات، بەڵام وانگ قیشان، جێگری سەرۆکی چین بەشداری بکات.

بەشار ئەسەد، سەرۆکی سووریا

 

بەشار ئەسەد، سەرۆکی سووریا بانگهێشتی رێوڕەسمەکە نەکراوە.

 

لە خۆپێشاندانەکانی ئاداری ساڵی 2011وە و وەڵامی تووندی سوپا و هێزە ئەمنییەکانی دیکەی سووریا دژی خۆپیشاندەران و کوژران و برینداربوون و بێسەروشوێنبوونی سەتان هەزار کەس و ئاوارە و پەنابەربوونی ملیۆنان کەسی دیکە، بەریتانیا لە ئایاری ساڵی 2012وە باڵیۆزی سووریای لە لەندەن دەرکرد.