میترۆ,رووداو
لە پارێزگای هەڵەبجە ژمارەیەک چالاکڤان کاتێک ئامادەکارییان بۆ خۆپێشاندان دەکرد، دەستگیرکران و دواتر ئازادکران.
رۆژی دووشەممە 13ی ئاداری 2023، لوقمان عەبدولقادر، سەرۆکی کۆمەڵەی قوربانییانی کیمیابارانی هەڵەبجە بە تۆڕی میدیایی رووداوی گوت: "ئەوانەی دەستگیرکرابوون ئاسایش دەستگیریکردبوون، بە پاساوی ئەوەی بە بڵندگۆ و لەسەر ئۆتۆمبێلەوە دروشمیان دژی حکومەت و دامەزراوەکان گوتووەتەوە وەکو ئاسایش باسی دەکات، بەڵام ئێمە هەر زوو هاتینە سەر هێڵ و داوای ئازاکردنمان کردن و ماڵیان ئاوابێت ئازادیان کردن."
هەروەها، ژمارەیەک رێکخراو و چالاکڤانی کۆمەڵگەی مەدەنی لە راگەیێندراوێکیاندا سەرکۆنەی دەستگیرکردنی ئەو چالاکڤانانەیان کرد و رایانگەیاند: "بەکارهێنانی ترس و تۆقاندن لەلایەن هێزە ئەمنییەکان و سەرکوتکردنی مافی هاووڵاتییان بۆ دەربڕینی بیروڕای خۆیان، دژ بەو بەها بەرزانەن کە هاووڵاتییانی شارەکە قوبانیيان بۆ داوە. دەستگیرکردنی ئەو چالاکڤانانە پێشێلکارییەکی ئاشکرای بەندەکانی مافی مرۆڤی نێودەوڵەتی و یاسا کارپێکراوەکانی هەرێمی کوردستانە کە ئازادی رادەربڕین و گردبوونەوە گەرەنتی دەکات."
ئەو رێکخراو و لایەنانە داوا لە دەسەڵاتداران دەکەن، خۆیان لە بەکارهێنانی هێز یان پەنابردن بۆ دەستبەسەرکردنی ئارەزوومەندانە بەدوور بگرن و لەگەڵ رێکخراوەکانی کۆمەڵگەی مەدەنی و لایەنە پەیوەندیدارەکانی دیکەدا گفتوگۆیەکی بنیاتنەر بکەن بۆ چارەسەرکردنی ناڕەزایەتییە رەواکانی هاووڵاتییان.
ناوی رێکخراوەکان:
سەنتەری میترۆ
ڕێکخراوی هەڵوێست
رێکخراوی پایتەختی ئاشتی
رێکخراوی بەدیل بۆ دیبەیت
رێکخراوی کوردستان بۆ هەموان
پەیمانگەی کوردی بۆ هەڵبژاردن
هادی حەمەرەشید، چالاکڤان و چاودێری سیاسی
کۆمەڵەی قوربانییانی کیمیابارانی هەڵەبجە
فیدراسیۆنی رێکخراوەکانی کۆمەڵی مەدەنی
رێکخراوی ئاران بۆ پەرەپێدانی کولتووری مەدەنی
موجاهید حەمەئەمین، چالاکڤانی مەدەنی
رێکخراوی دۆستانی هەڵەبجە