رووداو دیجیتاڵ
سەرۆكی لیژنەی بەدواداچوون بۆ خۆپێشاندانەكانی سلێمانی رایگەیاند هێشتا بەشێك لەخۆپێشاندەرەكانی سنووری سلێمانی ئازاد نەکراون، بەڵام ژمارەیان کەمە.
شاخەوان رەئووف بەگ، ئەندامی پەرلەمانی کوردستان سەرۆكی لیژنەی بەدواداچوون بۆ خۆپێشاندانەكانی سنووری پارێزگای سلێمانی بە (تۆڕی میدیایی رووداو)ی راگەیاند هێشتا بەشێك لەو كەسانەی لەسەر خۆپێشاندانەكان گیراون ئازاد نەكراون.
شاخەوان رەئووف بەگ، گوتی: "بەدواداچوونمان بۆ ئەو پرسە كردووە، بەرپرسانی پۆلیس دەڵێن ئەوانەی ماون ئازاد بكرێن، ژمارەیان لە پەنجەی دەست تێناپەڕێت و سكاڵای كەسیشیان لەسەرە بۆیە ئازادنەكراون".
سەرۆكی لیژنەی بەدواداچوون بۆ خۆپێشاندانەكانی سنووری پارێزگای سلێمانی ئەوەی نەشاردەوە كە هیچ كەسێك لەسەر تەقەكردن دەستگیر نەكراوە، بەڵام لێكۆڵینەوەكان بەردەوامەو گوتی "لەدوای خۆپێشاندانەكان لە پەرلەمان سێ لیژنەی بەدواداچوون بۆ خۆپێشاندانەكانی سلێمانی و هەڵەبجەو گەرمیان و راپەڕین دروستكرا دوای پشووەكانی سەری ساڵ هەر سێ لیژنەكە راپۆرتی كۆتایی خۆیان ئاڕاستەی سەرۆكایەتی پەرلەمان دەكەین".
لەسەرەتای ئەم مانگەدا، خۆپێشاندان لە سنووری پارێزگاكانی سلێمانی و هەڵەبجە و ئیدارەكانی گەرمیان و راپەڕین کرا، لەو خۆپێشاندانانە 10 کەس لە خۆپێشاندەران و هێزە ئەمنییەکان گیانیان لەدەستدا و 70 كەسیش بریندار بوون، نزیكەی 300 خۆپێشاندەریش دەستگیركران. هەروەها ژمارەیەکی زۆر لە بارەگای حیزبی و فەرمانگەی حکومی لەلایەن خۆپێشاندەرانەوە سووتێندران.
-rudaw