رێکخراوی رۆژنامەنووسانی بێسنور لە راپۆرتی ساڵانەیدا بڵاویکردەوە، لە ساڵی ٢٠٢٠دا ٥٠ رۆژنامەنووس بەهۆی کارەکانیانەوە کوژراون و عێراقیش لە پلەی دووەمدایە بە کوژرانی شەش رۆژنامەنووس لە وڵاتەکەیدا.
رێکخراوی رۆژنامەنووسانی بێسنور لە راپۆرتێکدا باسی لەوەکردووە، ٦٨٪ی ئەو رۆژانامەنووسانەی کوژراون، لەو وڵاتانەدابوون، کە تێیدا سەقامگیریی هەیە، لەکاتێکدا تەنها ٣٢٪ی ٥٠ رۆژنامەنووسە کوژراوەکان لە ناوچەی جەنگ و ململانێدا کوژراون، وەک سوریا، عێراق، یەمەن و ئەفغانستان.
ئاماژە بەوەشکراوە، مەکسیك زۆرترین کوژراوی تێدایە بە هەشت رۆژنامەنووس و دوای ئەویش هیندستان دێت بە چوار حاڵەتی کوشتن و فلیپین و هندۆراسیش سێ رۆژنامەنووسی تێدا کوژراوە، کە ئەمانە ئەو وڵاتانەن سەقامگیریان تێدا هەیە.
لە بەراوردی گشتیشدا، عێراق دوای مەکسیك دێت بە کوژرانی چوار رۆژنامەنووس لە نیوەی دووەمی ٢٠٢٠دا و شەش رۆژنامەنووسیش لە تەواوی ساڵەکەدا.
لە راپۆرتەکەدا ئەوەش هاتووە، حاڵەتی کوشتنەکان بەهۆی راپۆرتکردن لەسەر گەندەڵی و خراپ بەکارهێنانی سامانی گشتی، چالاکی تاوانی رێکخراو یان خۆپیشاندانەوە روویانداوە.
-nrttv