دەستەی مامۆستایانی وانەبێژ رایگەیاند، رۆژی یەكشەممەی داهاتو خۆپیشاندانی مەدەنیان لەبەردەم بینای ئەنجومەنی وەزیرانی هەرێم ئەنجام دەدەن لەپێناو داواكردنی مافە سەرەتاییەكانیان.
ئاوێنە: دەستەی مامۆستایانی وانەبێژ لە هەرێمی كوردستان، ئەمڕۆ چوارشەممە، لە راگەیەندراوێكدا وتی"ڕۆژی یەكشەممە ڕێكەوتی 19ی 11ی 2023 خۆپیشاندانی مەدەنیانەو ئاشتیانەی مامۆستایانی وانەبێژ لە ھەولێر لەبەردەم بینای ئەنجومەنی وەزیران كاتژمێر 10:00ی بەیانی دەستپێدەكات."
ئەوەشی خستۆتەڕو، خۆپیشاندانەكە لە پێناو داواكردنی مافی سەرەتاییمانە كە دامەزراندن و بون بە ھەمیشەیی وانەبێژانە" و هەروەها لە پێناو "گەڕانەوەی ڕێز و شكۆ بۆ مامۆستا" و "بەرەو پێشچونی سلكی پەروەردە" و "بە یەكچاو سەیركردن لە ماف و ئەركدایە."
دەستەكە داواشی لە مامۆستایانی وانەبێژ كردوە ئامادەی خۆپیشاندانەكە بن.
سەرچاوە/ ڕووداو