کۆچ و کۆچبەران: 26 هەزار خێزان لە کامپەکانی هەرێمی کوردستان ماون، زۆربەیان خەڵکی شنگالن




وەزارەتی کۆچ و کۆچبەرانی عێراق رایگەیاند، داخستنی کامپەکان، مانای داخستنی دۆسیەی ئاوارەکان نییە. نزیکەی 26 هەزار خێزان لە کامپەکانی هەرێمی کوردستان ماون.
 
رۆژی پێنجشەممە، 04-07-2024 عەلی عەباس، بەرپرسی لقەکان و گوتەبێژی وەزارەتی کۆچ و کۆچبەرانی عێراق بە تۆڕی میدیایی رووداوی گوت: "23 کامپی ئاوارەکان لە هەرێمی کوردستان ماون، کە نزیکەی 26 هەزار خێزان ئاوارەیان تێدایە، زۆربەیان خەڵکی شنگالن."
 
گوتەبێژی وەزارەتی کۆچ و کۆچبەران دەڵێت: "زۆربەی ئاوارەکانی نێو کامپەکان لە پارێزگای دهۆکن، نزیکەی 21 هەزار خێزانن. دواتر هەولێر دێت، نزیکەی 5 هەزار خێزانن. لە سلێمانی تەنیا کامپی ئاشتی ماوە، ژمارەیەکی کەمی ئاوارەی تێیدا ماوە، ئەویش بەم نزیکانە بە تەواوی دادەخرێ".
 
گوتەبێژی وەزارەتی کۆچ و کۆچبەرانی عێراق رەتیکردەوە داخستنی کامپەکان، بە مانای کۆتایی هاتنی دۆسیەی ئاوارەکان بێت و گوتی: "بە هەزارانی ئاوارە هەن کە لە کامپەکان نین، ئەمە بابەتێکی زۆر گەورەیە، بەڵام داخستنی کامپەکان زەمینەسازییە بۆ کۆتاییهاتنی دۆسیەی ئاوارەکان".
 
ئەنجوومەنی وەزیرانی عێراق رۆژی 30ی تەممووزی ئەم ساڵی وەکو دوا کات بۆ داخستنی کامپی ئاوارەکان لە هەرێمی کوردستان داناوە.
 
-Rudaw


PM:01:17:04/07/2024




ئه‌م بابه‌ته 152 جار خوێنراوه‌ته‌وه‌‌