پەرلەمانی کوردستان نیگەرانییەکانی دەگەیەنێتە کونسوڵخانەی تورکیا




سەرۆکایەتی پەرلەمانی کوردستان رایگەیاند، نارەزایی و نیگەرانی قوڵی پەرلەمانیان لە بارەی زیانپێگه‌یاندن به‌ژیان و ئاقاری گوندنشینه‌كانی گونده‌كانی سنووری ناحیه‌ی ده‌ركار و باتیڤا و كانی ماسی گەیاندووەتە کونسوڵخانەی تورکیا كه‌به‌هۆی شه‌ڕی نێوان ئەو وڵاتە و په‌كه‌كه‌ هاتووەته‌ ئاراوە.

ئەمڕۆ سێشەممە، هێمن هەورامی جێگری سەرۆکی پەرلەمانی کوردستان لە راگەیەنراوێکدا ئاشکرای کرد، پێشوازی لە کونسولی گشتی تورکیا کردووە و نارەزایی و نیگەرانی قوڵی پەرلەمانی کوردستانی  لە بارەی زیانپێگه‌یاندن به‌ژیان و ئاقاری گوندنشینه‌كانی گونده‌كانی سنووری ناحیه‌ی ده‌ركار و باتیڤا و كانی ماسی كه‌به‌هۆی شه‌ڕی نێوان ئەو وڵاتە و په‌كه‌كه‌ هاتووەته‌ ئاراوە، پێ راگەیاندووە.

ئاماژەی بەوەشداوە، لە کۆبوونەوەیەکیاندا گفتوگۆیان لەبارەی ره‌وشی سیاسی كوردستان و كاره‌كانی په‌رله‌مان و ئاماده‌كارییه‌كانی ده‌ستوورو گفتوگۆكانی نێوان هه‌رێمی كوردستان و حكومه‌تی عێراق له‌سه‌ر جێبه‌جێكردنی بودجه‌ی ٢٠٢١ و شایسته‌ داراییه‌كانی هه‌رێم کردووە.

بەگوێرەی راگەیەنراوەکە، "جه‌ختمان له‌وه‌ كردەوه‌ كه‌هه‌رێمی كوردستان بژارده‌ی شه‌ڕ و په‌لامار له‌هه‌رلایه‌كه‌وه‌ بێت ره‌تده‌كاته‌وه‌ و داواکراوە سه‌روماڵی هاووڵاتییانمان له‌ناوچه‌ سنوورییه‌كان و سروشتی ناوچه‌كه‌ پارێزراوبن".

تیایدا هاتووە، داوایان کردووە قه‌ره‌بووی زیان لێكه‌وتووان بكرێته‌وه ‌و كۆتایی به‌زیانگه‌یاندن به‌ژیان و ئاقاری گوندنشبنانی ناوچه‌كه‌ بهێنریت.

 ئەمە لەکاتێکدایە، لە ماوەی رابردوو سوپای تورکیا بە بیانوی هەبوونی بنکە و بارەگای پارتی کارێکارانی کوردستان لە ناوچەکانی مەتینا و ئەفشین – باسیان لە هەرێمی کوردستان دەستی کرد بە ئۆپراسیۆنی چنگی بروسکە و چنگی هەورە تریشقە بە ئامانجی هێرشکردن و  لێدان لەو پێگە و بنکانە، بەردەوام بە هۆی هەمان بیانووەوە لە رێگەی فڕۆکەی جەنگییەوە بۆردومانی ناوچەی بادینان دەکات. لە نوێترین روداویشدا ژمارەیەکی زۆر درەختی دارستانەکانی ناوچە سنورییەکانی نێوان هەرێم و تورکیایان بڕییەوە و نیگەرانییەکی زۆری بە دوای خۆیدا هێنا.

-nrttv



PM:04:37:01/06/2021




ئه‌م بابه‌ته 236 جار خوێنراوه‌ته‌وه‌‌