تیرۆر بە هێزی نەرم
رەحمان غەریب

ميترو

مانای چییە ئازادی بۆ هەموو كەس هەبێت هەرێمی كوردستان لە قوڕێ نێت، بەڵام كە دەرفەتی دەربڕین بۆ ئەوانیتر دەرەخسێت، ئیدی جەنگێكی دەروونی و هەڵمەتێكی ناوزڕاندن هاوشانی دەستپێدەكات، هەڵمەت بۆ سەر پارێزگاری هەڵەبجە نموونەیەكی نوێیە.    
كە ئازادی بۆ تۆ هەبوو ئەزموونی هەرێمی كوردستان بە كارتۆنی بشوبهێنی، ئاساییە هەمان پانتایی بۆ دژەكان فەراهەم بێت كە عێراق بە كارتۆنێكی بەتاڵ و تائیفی و لەرزۆك وەسفبكات، بۆ نا؟. 
گەندەڵی، سیستەمی تائیفەگەری، تەراتێنی وڵاتانی درواسێ، ریزبەندی عێراق لە راپۆرتە نێودەوڵەتییەكان، ئازادی رۆژنامەگەری، بارودۆخی ژنان، دەربازبوون لە سزا، ناشەفافییەت، بێكاری، هەژاری،  دەسەڵاتی مافیا، یەكسانبوونی كاری سیاسی بە دەوڵەمەندبوونی نامەشروع، گەندەڵی و گروپی تەكفیری و میلیشیا، دەیان بواری تر وادەكات، قورس بێت دڵمان بە حوكمڕانییەكەی خۆشبێت. 
بگەڕێینەوە بۆ مێژوو، لە هەموو قۆناغەكانی خەباتی سیاسی و چەكدارییان، گەلی كوردستان و پارتە سیاسییەكانی، دروشم و داخوازییەكانی، لكاندووە بەبوونی دیموكراسیەت بۆ عێراق، بەو مانایەی عێراق ئەگەر سیستمەكەی دیموكراسیی نەبێت، داخوازییە رەواكانی بزوتنەوەی سیاسی هاونیشتیمانیانی خەیاڵی شاعیرانەش تێدەپەڕێنێت.
دروشمی بزوتنەوەكە ڕوونبوو، مەرجی بوونی سیستمی دیموكراسییەت لەعێراقدا، گرنگ بوو، چونكە زەمینە خۆشدەكات بۆ  داخوازییە رەواكانیان، دروشمەكانی وەك: دیموكراسی بۆ عێراق ئۆتۆنۆمی بۆ كوردستان، دیموكراسی بۆ عێراق ئۆتۆنۆمی راستەقینە بۆ كوردستان، دیموكراسی بۆ عێراق مافی چارەنوس بۆ كوردستان، بەرەوپێشچوونی داخوازییەكانی پاش پرۆسەی گۆڕانی سیاسی لە عێراق، داهاتوودا گرێدرا بە مەرجی بوونی حوكمی دیموكراسی لە بەغداد.
لەو گێژاوە سیاسییەی عێراق، تۆ كەدەڵێیت عێراق بەهێز بێت، هەرێمی كوردستان بەهێز دەبێت، بۆ هەموو قۆناغێك راست نییە، ئایا لەسەردەمی فاشییەتی رژێمی بەعس ئەمە راست بوو؟ نەخێر ئەی لەسەردەمی سیستمی تائیفەگەری و میلیشایی و هەژموونی ئیسلامی سیاسی ئەمە رەوایە؟
بەهێزكردنی ناوەند بە لاوازكردنی هەرێمی كوردستان، درۆیەكی گەوەرەی تری ئەو حزبانەیە كەمافە رەواكانی گەلی كوردستانیان بە سیستمی دیموكراسی لە عێراق گرێدەدا.
عێراق پرۆسە سیاسییەكەی، چینە حوكمڕانەكەی ئومێدی ئەوەی نییە بكەوێتە سەر راستەڕێی چاكسازی و گۆڕانكاری بنەڕەتی و دابڕان لە رابردووی خۆی؟ ئیدی بۆ بە قسەكانی ئازاد تۆفیق، گڕت گرتووە؟
سیستمی سیاسی لە عێراق لە لێواری داڕووخانە ئەگەر گۆڕانكاری جەوهەری لە رێڕەوی حوكمڕانی نەكرێت، داخوازی رەوای هاوڵاتیان جێبەجێنەكرێت لە هاتنە كایەی سیستمێكی تر كەماف و كەرامەتیان بپارێزێت، ئەمە قسەی هەموو ئەوانەن كە بە واقیعی تەماشای ئایندەی سیاسی عێراق دەكەن، نەك پارێزگاری هەڵەبجە.
شاگەشكەبوونی هەندێ شرۆڤەكارو ئەندامانی ئێستاو پێشوو و پێشووتری پەرلەمانی عێراق و كوردستان، سیاسی خاوەن بەرژەوەندی تایبەت لە بەغدا، دەربارەی هەر بڕیارێك دژ بە هەرێمی كوردستان دەردەچێت، شوكهێنەرە.
شوكهێنەرە نەك لەبەر ئەوەی كوردستان نمونەی سیستمی دیموكراسیی و مافەكانە، نەخێر، ئێمە رەخنەگران و چالاكوانی راستەقینەی مافەكانی مرۆڤ، 32 ساڵە نارەزایەتی بەرامبەر شێوازی حوكمڕانی خۆمان دەردەبڕین هێشتا چاوەڕوانی گۆڕانكاری جەوهەرین لە رێڕەوی حوكمڕانی بۆ سیستمێكی ئەلتەرناتیڤ.  
رەخنەگرتن لەشێوازی حوكم لە عێراق، مانای دەوڵەمەندبوونی ئەزموونی دیموكراسی هەرێمی كوردستان، نییە، پێچەوانەكەشی راستە.
كە ئازاد تۆفیق پۆستی رەسمی هەبوو، مانای ئەوە نییە لەسەر ئازادی بیروڕا جا  " هاوڕای بیت یان دژ"، بەنەرمە هێزی تۆڕە كۆمەڵایەتییەكان بەردبارانی بكەین.


AM:01:11:03/04/2023