لە بارەی رووداوەكەی هەولێر، بۆردی بەڕێوەبردنی دەزگایی میدیایی كوردسات، رونكردنەوەیەك بڵاو دەكاتەوە و دووپاتی دەكاتەوە، رووداوەكە نە بە راستەوخۆ، نە بە تۆماركراو، لە هیچ هۆكارێكی بینراو و بیستراو و سۆشیال میدیای كوردساتدا بڵاو نەكراوەتەوە، ئەمەش دەقی روونكردنەوەكەیە:
روونكردنەوەیەك لە بۆردی بەڕێوەبردنی دەزگایی میدیایی كوردساتەوە
پاش ئەوەی ئەمڕۆ بەرواری 18/5/2021 ئاگاداری نوسینگەی هەولێری دەزگای میدیایی كوردسات كرا، كە خۆپیشاندانی كوردانی ڕۆژهەڵات لە بەردەم بارەگای نەتەوە یەكگرتوەكان بەڕێوە دەچێت، هەر بۆیە ئێمەش وەك كاری میدیایی خۆمان تیمێكی تایبەتمان ڕەوانەی شوێنی خۆپیشاندانەكە كرد و پاش گەیشتنی تیمەكەمان بۆ ئەوێ، بینرا دوو گەنج بە مەبەستی داواكردنی مافی خۆیان سەردانی بارەگای UN كردبوو، دواتر دوای هاتنە دەرەوەیان گەنجێكیان سكاڵای خۆی گەیاندە لایەنی پەیوەندیدار و لە بەردەم میدیاكاندا هەڕەشەی خۆسوتاندنی كرد، پاشان بە داخەوە ئەو ڕووداوە نەخوازراوە ڕوویدا، كاتێكیش رووداوەكە بوە، تیمی ئێمە، كە خانمە پەیامنێرێك و كامێرامانێك بوون لەبەر ئەوەی پێشبینی وەها ڕووداوێكیان نەكردبوو، جگە لە هاوار و قیژە چیتریان لە دەست نەهات
بۆ هەموو لایەكی ڕوون دەكەینەوە، ئێمە لە دەزگای میدیایی كوردسات، لەگەڵ پاراستنی ئیتیكی كاری ڕۆژنامەگەری و بەها مرۆڤایەتیەكانداین و هەمیشە پێشەنگی پاراستنی كەرامەتی مرۆڤ بووین.
دەزگای میدیایی كوردسات وێڕای داوای لێبوردن لەو گەنجە و خەڵكی كوردستان كە دەبوایە زیاترمان بكردایە بۆ رێگریكردن لەو رووداوە، بۆ هەموو لایەكی ڕوون دەكەینەوە كە بە هیچ جۆرێك هیچ ڤیدیۆ و وێنەیەكی ئەو ڕووداوە نە بە راستەوخۆ، نە بە تۆماركراو لە دەزگای میدیایی كوردسات پەخش نەكراوە و كوردسات جەخت دەكاتەوە وەك چۆن پێشتر و بەردەوام، لەگەڵ پاراستنی ئیتیكی ڕۆژنامەنوسی و مافی مرۆڤدا بوە، و هیچ كات لەگەڵ گواستنەوەی روداوەكانی توندوتیژیدا نەبوە، و هیچ كات دەزگای میدیایی كوردسات نەبوە بەشێك لە هاندانی خەڵك بۆ ئەو جۆرە كارانە و لە مێژووی بیست و یەك ساڵی كاركردنیشیدا بۆ یەكەم جارە ڕووداوی لەم جۆرە ڕوو بدات.
دەزگای میدیایی كوردساتیش لێكۆڵینەوەی خۆی لەگەڵ ئەو تیمەی كە ڕووماڵی ئەو ڕووداوەیان كردوە دەست پێ كردوە، و هەموو رێكارێكی پێویست دەگرێتە بەر بۆ پەرەپێدان بە ئێتیكی كاری رۆژنامەگەری و ئاستی پیشەیی كارمەندەكانمان
ئەم ڕووداوە وامان لێ دەكات وەك وانەیەك زیاتر سووربین لە سەر پاراستنی بنەماكانی مافی مرۆڤ و راهێنانی زیاتری تیمەكانمان بۆ ئامادەبوونیان لە رووبەرووبوونەوەی ڕووداوی لەم جۆرەدا
هەرگیز دەزگای میدیایی كوردسات هیچ روماڵێكی لە ژیان و سەلامەتی مرۆڤ پێ گرنگتر نییە.
داواكارین لە خوای گەورە هەرچی زوە شیفای ئەو گەنجە بدات و هەموو لایەنەكانیش ئاوڕێكی جددی لە خەم و كێشە و گرفتەكانی گەنجان و هەموو چینەكانی تری كۆمەڵگادابن، تاوەكو ڕووداوی هاوشێوە دووبارە نەبێتەوە
بۆردی بەڕێوەبردنی دەزگای میدیایی كوردسات